თბილისის საქალაქო სასამართლოს მოსამართლე არსენ კალატოზიშვილმა წინასწარი პატიმრობა შეუფარდა რადიოაქტიური ნივთიერებების გაყიდვის მცდელობისას დაკავებულ სამ პირს. სასამართლო პროცესის შემდეგ პროკურორმა მედიას უთხრა, რომ დაკავებულებს გარდა აკრძალული ნივთიერების ფლობისა და გაყიდვის მცდელობისა, შესაძლოა ბრალად წაუყენონ ფიროსმანის ნახატის შენახვისა და გაყიდვაში მონაწილეობაც.
პროკურორის, ბექა ხუნაშვილის თქმით, გამოძიებას აქვს “შესაბამისი მტკიცებულებითი საფუძველი” იმის სათქმელად, რომ ერთ-ერთი ბრალდებულის სახლში ინახება ფიროსმანის ნახატის ასლი, რომელიც ფიროსმანის ხელითვეა შესრულებული, ამ ნახატის ორიგინალი კი ერთ-ერთ მუზეუმშია დაცული. გამოძიების ინტერესებიდან გამომდინარე პროკურორმა ნახატის სახელი არ თქვა და არც ის დაასახელა, რომელ მუზეუმშია დაცული ფიროსმანის ორიგინალი ტილო, რომლის არსებობის შესახებაც გამოძიებას აქვს ეჭვი. ბექა ხუნაშვილის თქმით, ამ ასლის აღმოსაჩენად “კონკრეტული საგამოძიებო პროცედურები” უნდა ჩატარდეს.
“გამოძიება მიმდინარეობდა რამდენიმე ბრუნვიდან ამოღებული ნივთის გასაღების ფაქტზე, ეს შეიძლება ყოფილიყო ციანიდი, შეიძლებოდა ყოფილიყო რადიოაქტიური ნივთიერება ან სხვა რაიმე ნივთი. შესაბამისად, იმ შედეგების და მონაცემების გათვალისწინებით, რაც საქმეზე დაიდო ამომწურავი ღონისძიების შედეგად, ბრალი წარედგინათ პირებს.
ის ნამუშევარი, ორიგინალი ერთ-ერთ მუზეუმშია დაცული. ანალოგიური ასლი, შესაძლია, ოღონდ ფიროსმანის შესრულებული, არსებობდეს, რომლის აღმოსაჩენადაც გამოძიება უნდა წარიმართოს. ეს ნახატი ჯერ აღმოჩენილი არ არის. არსებობს შესაბამისი მტკიცებულებითი საფუძველი იმისა, რომ ბრალდებულთა თანამონაწილე ანდა ბრალდებულთა ნაცნობთან ინახება” – თქვა პროკურორმა ბექა ხუნაშვილმა სასამართლო პროცესის დასრულების შემდეგ.