ბოლნისის ახალი მუზეუმის მშენებლობის პირველი ეტაპი დასრულდა. როგორც ახალ შენობაში დღეს შეიკრიბნენ საქართველოს კულტურისა და ძეგლთა დაცვისა და გარემოსა და ბუნებრივი რესურსების დაცვის მინისტრები, საქართველოს ეროვნული მუზეუმის დირექტორი, ქვემო ქართლის გუბერნატორი, ბოლნისის მუნიციპალიტეტის გამგებელი დავით შერაზადიშვილი, კომპანია RMG-ის წარმომადგენლები, ბოლნისის მზარეთმცოდნეობის მუზეუმის თანამშრომლები, ბოლნელი მთავარეპისკოპოსი ეფრემი, სასულიერო პირები და სხვა სტუმრები.
„დღევანდელი დღე არის ისტორიული ჩვენი მუნიციპალიტეტისთვის. ბოლნისი არის უძველესი ქალაქი, რომელიც ყოველთვის გამოირჩეოდა კულტურული ღირებულებებითა და ტრადიციებით. სულ მალე ბოლნისს ახალი კულტურის კერა შეემატება, რომელიც თავისი მნიშვნელობით არის ძალიან ღირებული. მუზეუმის კონცეფცია არის მრავალფეროვანი. თანამედროვე სტანდარტების ბოლნისის მუზეუმი იქნება საქართველოს ერთ–ერთი მნიშვნელოვანი სამეცნიერო და საგანმანათლებლო ცენტრი. საგამოფენო დარბაზებში ასევე შესაძლებელი გახდება რეგიონში მოპოვებული საინტერესო ექსპონატების გამოფენა. ვფიქრობთ, ახალი მუზეუმი საშუალებას მოგვცემს კიდევ უფრო მეტი ტურისტი მოვიზიდოთ. განსაკუთრებული ხაზგასმით მინდა აღვნიშნო კომპანია ,,არემჯის” წვლილი ამ საშვილიშვილო საქმეში. მიუხედავად სკეპტიკურად განწყობილი ოპონენტების მოსაზრებებისა, კომპანიამ იტვირთა სოციალური პასუხისმგებლობა და სრულად დააფინანსა ბოლნისის მუზეუმის მშენებლობა. მინდა ასევე მადლობა გადავუხადო საქართველოს კულტურისა და ძეგლთა დაცვის სამინისტროსა და საქართველოს ეროვნულ მუზეუმს დაუღალავი შრომისთვის. მჯერა, სულ მალე, ბოლნისის ახალი მუზეუმი ღირსეულ ადგილს დაიკავებს საქართველოს კულტურულ რუკაზე“, – განაცხადა ბოლნისის მუნიციპალიტეტის გამგებელმა დავით შერაზადიშვილმა.
სამუშაოების დასრულების შემდეგ, თანამედროვე სამუზეუმო სტანდარტების გათვალისწინებით, სპეციალისტები ჩაატარებენ გარემოპირობების მონიტორინგს, მოხდება შენობის ადაპტაცია კოლექციების მისაღებად და მუზეუმის აღჭურვის შემდეგ, მომზადდება ექსპონატები ინსტალაციისთვის. ბოლნისის მუზეუმის მუდმივმოქმედ გამოფენაზე წარმოდგენილი იქნება მდიდარი ვიზუალური მასალა დმანისიდან, არუხლოდან და საყდრისიდან. როგორც ბოლნისის მუნიციპალიტეტში აცხადებენ, ბოლნისის მუზეუმი იქნება საქართველოს ერთ-ერთ მნიშვნელოვანი სამეცნიერო და საგანმანათლებლო ცენტრი. მუზეუმში მოეწყობა დროებითი გამოფენები და სხვადასხვა კულტურულ-საგანმანათლებლო ღონისძიება. მუზეუმი შეასრულებს რაიონში კულტურის, არაფორმალური განათლებისა და ტურიზმის ცენტრის ფუნქციას, სადაც იმუშავებს მედიათეკა და საკონფერენციო დარბაზი. ექსპოზიციის სამეცნიერო კონცეფცია მუშავდება ეროვნული მუზეუმის გენერალური დირექტორის დავით ლორთქიფანიძის ხელმძღვანელობით. სამეცნიერო თემების კურატორები არიან როგორც ქართველი, ასევე გერმანელი მეცნიერები.
2015 წლის დასაწყისში საქართველოს კულტურისა და ძეგლთა დაცვის სამინისტროს ინიციატივით საქართველოს ეროვნულმა მუზეუმმა მოამზადა ბოლნისში ახალი მუზეუმის შექმნის კონცეფცია. 2015 წლის ზაფხულში გამოცხადდა კონკურსი ბოლნისის ახალი სამუზეუმო-საგანმანათლებლო სივრცის პროექტირებაზე. კონკურსში გაიმარჯვა კომპანიამ „არქიტექტორები.ჯი“. არქიტექტურული პროექტის ავტორია გაგა კიკნაძე. 2016 წლის მაისში დაიწყო მუზეუმის სამშენებლო სამუშაოები. საქართველოს ეროვნული მუზეუმი მუშაობს მუზეოგრაფიაზე ფრანგ დიზაინერთან ლინა ლოპესთან ერთად, რომელიც მრავალი წელია წარმატებით თანამშრომლობს ინსტიტუციასთან. აღსანიშნავია, რომ სწორედ ეს ჯგუფი მუშაობდა სვანეთის მუზეუმის რეაბილიტაციის პროექტზე.
ბოლნისის ახალი მუზეუმის არქიტექტურული პროექტის მომზადებისა და სამშენებლო სამუშაოების ხარჯები RMG Gold-მა სრულად დაფარა. კომპანია აგრძელებს პროექტის შემდგომი ეტაპით გათვალისწინებული სამუშაოების მხარდაჭერას.