იცით, რომ ჩვენ გადმოვთარგმნეთ უკრაინული კანონმდებლობა, რომელიც დეოლიგარქიზაციას შეეხება. ძალიან მალე ჩვენ ამ კანონპროექტს დავაინიციირებთ და თუ ვინმეს შეეხება ეს კანონპროექტი, ეს იქნება ბატონი კეზერაშვილი. რომელიც პირდაპირ სააშკარაოზეა გამოსული და მას კვერს უკრავენ მისი მონა-მორჩილები, – ამის შესახებ საპარლამენტო უმრავლესობის წევრმა გია ცაგარეიშვილმა გადაცემაში „იმედი LIVE“ განაცხადა.
„რაც შეეხება კეზერაშვილის ფაქტორს, როგორც ჩანს, ეს ბატონი გახდა ექსკლუზიური პატრონი „ნაციონალური მოძრაობის“, დამფინანსებელი და ვინც ფულს იხდის, ის უკვეთს მუსიკას, მოგეხსენებათ და ახლა მისი სალამურის ქვეშ დავლურს ცეკვავს წრეში ყველა, აწყვეტილად, დუჟმორეული. ზღვარგადასული, ჩართული ამ გიჟურ ფერხულში. ამ ფერხულში ზოგი წაიქცევა, ზოგი გადაალაჯებს, არ ჩერდებიან, არავინ ახსოვთ, არც გვერდზე მდგომი, არც გულშემატკივარ, არც ამომრჩეველი, არც საზოგადოება, არც ქვეყანა. არც ის სიტუაცია, რაშიც დღეს საქართველოს უწევს ცხოვრება და ბეწვის ხიდზე დავდივართ“, – განაცხადა ცაგარეიშვილმა.