ჩვენ ვართ პატარა ქვეყანა, ძალიან მცირე მოსახლეობით, სადაც დიდი რაოდენობით უცხო ქვეყნის მოქალაქეების შემოშვება, მითუმეტეს მტრული სახელმწიფოდან დაკავშირებულია უსაფრთხოების რისკებთან, ამის შესახებ პარლამენტის ვიცე-სპიკერმა, „მოქალაქეების“ წევრმა ლევან იოსელიანმა „ქრონიკაში“ განაცხადა.
მისი თქმით, სერიოზულად უნდა გაანალიზოს სახელმწიფომ ამ რაოდენობის დეზერტირის ქვეყანაში შემოშვება.
„ასევე, სოციალურ რისკებთან, რადგან ეს ადამიანები დღეს რომ რაღაცას გამოურბიან, გავა დრო და ისინი ჩვენ ქვეყანაში სოციალურ პრობლემას შექმნიან. თუ ამ ადამიანებს ვუყურებთ როგორც დევნილებს, მაშინ ჩვენ მათზე უნდა ვიზრუნოთ, მაგრამ თუ ამ ადამიანებს ვუშვებთ როგორც ტურისტებს და ეჭვი მეპარება, რომ მათ ერთი წელი შეძლონ თავის რჩენა. მაშინ ვუშვებთ იმას, რომ ისინი კონკურენციაში შევლენ ჩვენ მოქალაქეებთან შრომით ბაზარზე. ვფიქრობ, რომ სერიოზულად უნდა გაანალიზოს სახელმწიფომ ამ რაოდენობის დეზერტირის შემოშვება, ობიექტურად დეზერტირები არიან, რადგან გამოურბიან სამხედრო სამსახურს. არ ვამბობ, რომ უნდა ჩავკეტოთ საზღვარი და არვინ შემოვუშვათ, მაგრამ გონივრული ფილტრი უნდა დაწესდეს, რომელიც უსაფრთხოების კომპონენტს მაქსიმალურად მოაგვარებს“, – განაცხადა ლევან იოსელიანმა.