იმ ძალადობის მცდელობის შემდეგ, რაც დავით წიკლაურმა განახორციელა მიმდინარე წლის ივნისში, რეალურად სპორტის სამინისტროსა და ჩვენი სისტემისთვის გინდ ყოფილა, გინდა არა – ცარიელი ადგილია, – ამის შესახებ კულტურის, სპორტისა და ახალგაზრდობის მინისტრმა, თეა წულუკიანმა განაცხადა.
წულუკიანი დავით წიკლაურის განცხადებას გამოეხმაურა.
„ბატონი დავით წიკლაური ეს არის გვარი და სახელი, რომელიც ჯერ კიდევ 2012 წლის ზაფხულში, როდესაც „ქართული ოცნება“ რეგიონებში ამომრჩეველს ხვდებოდა, იყო მაშინდელი სპორტის მინისტრის ინსტრუქციით ოპოზიციაზე მოძალადე სპორტსმენი. ამისთვის საკმარისია, რომ თქვენ ამოიღოთ ვიდეოარქივი. მას ამჟამად ჰქვია „კრივის ფედერაციის“ თავმჯდომარე. სინამდვილეში ის, იმ ძალადობის მცდელობის შემდეგ, რაც მან განახორციელა მიმდინარე წლის ივნისში, რეალურად სპორტის სამინისტროსა და ჩვენი სისტემისთვის არის გინდ ყოფილა, გინდა არა – ცარიელი ადგილი. ასეთია მსოფლიოს ყველა ქვეყანაში ქალზე მოძალადე ან ძალადობს მოსურნე მამაკაცის რეაქცია, რომ ის თითქოს, არაფერ შუაშია. ამიტომ აქ ახალი არაფერი არ ხდება.
ყველაზე მნიშვნელოვანი არის ის, რომ სპორტის სამინისტრო არავითარ შემთხვევაში ქართული კრივსა და ჩვენს მოკრივეებს, რომლებმაც წელს განსაკუთრებით კარგად იასპარეზეს, არ გაუშვებს ხელს. ჩვენ მათ ხელშეწყობას გავაგრძელებთ, ოღონდ რასაკვირველია, კრივის ფედერაციის გვერდის ავლით“, – განაცხადა წულუკიანმა.