“სტრატეგია აღმაშენებლის” ლიდერს სიცრუეში ადანაშაულებს “ქართული ოცნება”. მმართველ გუნდში აცხადებენ, რომ გიორგი ვაშაძის მიერ გავრცელებული ინფორმაცია აბსურდულია და დღეს ეს ამერიკის ელჩმაც დაადასტურა.
პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილე ალუდა ღუდუშაური გიორგი ვაშაძეს “უფუნქციო კომიკოსს” უწოდებს.
“ბატონი ვაშაძე ჩამოყალიბდა ერთგვარ უფუნქციო კომიკოსად. მას ბოლო პერიოდში განსაკუთრებით სულ უფრო და უფრო უჭირს ცირკის წარმომადგენლებთან და შოუმენებთან კონკურენციაში შესვლა და აქედან გამომდინარე, საზოგადოებას სთავაზობს ძალიან მდარე, უნიჭო საცირკო წარმოდგენებს და მე ვფიქრობ, რომ აქაც უკვე თუ მანამდე დაწინაურებული იყო პოზიციებში, უკვე ბოლო ადგილზეა,” – ამბობს ალუდა ღუდუშაური.
საუბარია ბრალდებაზე, თითქოს ხელისუფლებამ ამერიკას მრავალ მილიარდიან სამხედრო დახმარებაზე უარი უთხრა. ეს ინფორმაცია შტატების ელჩმაც უარყო.