ჩვენ მტკიცედ და ცალსახად ვგმობთ რუსეთის მიერ უკრაინის დონეცკის, ლუგანსკის, ზაპოროჟიესა და ხერსონის რეგიონების უკანონო ანექსიას, – ნათქვამია ევროპული საბჭოს განცხადებაში.
„ჩვენ მტკიცედ და ცალსახად ვგმობთ რუსეთის მიერ უკრაინის დონეცკის, ლუგანსკის, ზაპორიჟიესა და ხერსონის რეგიონების უკანონო ანექსიას, რაც წესებზე დამყარებულ საერთაშორისო წესრიგს ძირს უთხრის და უხეშად არღვევს უკრაინის ფუნდამენტურ უფლებებს დამოუკიდებლობაზე, სუვერენიტეტსა და ტერიტორიულ მთლიანობაზე და გაეროს წესდებასა და საერთაშორისო კანონმდებლობაში ასახულ ძირითად პრინციპებს“, – ნათქვამია განცხადებაში.
ევროპულ საბჭოში ხაზგასმით აღნიშნავენ, რომ რუსეთი საფრთხეს უქმნის გლობალურ უსაფრთხოებას.
„ჩვენ არ ვაღიარებთ და არასდროს ვაღიარებთ უკანონო „რეფერენდუმს“, რომელიც რუსეთმა ჩაატარა უკრაინის დამოუკიდებლობის, სუვერენიტეტისა და ტერიტორიული მთლიანობის შემდგომი დარღვევის საბაბად და არც მათ გაყალბებულ და უკანონო შედეგებს. ჩვენ არასდროს ვაღიარებთ უკანონო ანექსიას. ეს გადაწყვეტილებები ბათილია და არ შეიძლება რაიმე სამართლებრივი გავლენა ჰქონდეს. ყირიმი, ხერსონი, ზაპოროჟიე, დონეცკი და ლუგანსკი უკრაინაა. მოვუწოდებთ ყველა სახელმწიფოსა და საერთაშორისო ორგანიზაციას, ცალსახად უარყონ ეს უკანონო ანექსია“, – ნათქვამია განცხადებაში.
„რუსეთის აგრესიული ომისა და ბოლო ესკალაციის ფონზე, ევროკავშირი მტკიცედ დგას უკრაინისა და მისი ხალხის გვერდით. ჩვენ ურყევად ვუჭერთ მხარს უკრაინის ტერიტორიულ მთლიანობასა და სუვერენიტეტს. უკრაინა იყენებს ლეგიტიმურ უფლებას, დაიცვას თავი რუსული აგრესიისგან, რათა აღადგინოს სრული კონტროლი თავის ტერიტორიაზე და უფლება აქვს, გაათავისუფლოს ოკუპირებული ტერიტორიები მის საერთაშორისოდ აღიარებულ საზღვრებში. კრემლის ბირთვული მუქარა, სამხედრო მობილიზაცია და იმის მტკიცება, რომ ომი შესაძლოა ახლა რუსეთის ტერიტორიაზე მიმდინარეობდეს, არ შეარყევს ჩვენს გადაწყვეტილებას. ჩვენ გავაძლიერებთ ჩვენს შემაკავებელ ზომებს რუსეთის უკანონო ქმედებებთან დაკავშირებით. ეს კიდევ უფრო გაზრდის ზეწოლას რუსეთზე აგრესიული ომის დასასრულებლად“, – აღნიშნეს ევროპულ საბჭოში.