ავსტრიაში, ირლანდიასა და ისრაელში საქართველოს საპატიო კონსულებმა ეკონომიკის, ტურიზმის და ბიზნეს სფეროში საქართველოს დიდ პოტენციალზე ისაუბრეს. ინფორმაცია საქართველოს საგარეო საქმეთა სამინისტრო ავრცელებს.
უწყების ცნობით, პირველად, საქართველოს საგარეო საქმეთა სამინისტროს ორგანიზებით, „საქართველოს საპატიო კონსულების კონფერენცია – თანამშრომლობა მტკიცე პარტნიორობისათვის გაიმართა.” ღონისძიების ფარგლებში, საპატიო კონსულებმა საქართველოს მიმზიდველ გარემოს და სხვადასხვა სფეროში ქვეყნის დიდ პოტენციალს გაუსვეს ხაზი.
ისრაელში საქართველოს საპატიო კონსულის მენი ბენიშის განცხადებით, აღნიშნული ღონისძიება არის ძალიან მნიშვნელოვანი და ხელს უწყობს საქართველოს ცნობადობის ამაღლებას მსოფლიოს სხვადასხვა ქვეყანაში.
„ჩვენი მიზანია საქართველოში კიდევ უფრო მეტი ინვესტიციების მოზიდვა ისეთ სფეროებში როგორიც არის ეკონომიკა, ტურიზმი და სოფლის მეურნეობა, რათა კიდევ უფრო მეტმა ინვესტორმა წამოიწყოს ბიზნესი საქართველოში. ძალიან მნიშვნელოვანია, რომ ჩვენს დღეს შესანიშნავად მომზადებული ინფორმაცია მოვისმინეთ. მე პირადად საქართველოს სხვადასხვა სექტორში უკვე მაქვს ჩადებული ინვესტიციები”, – განაცხადა მენი ბენიშნმა.
ისრაელის საპატიო კონსულის თქმით, საქართველოს ისრაელიდან ძალიან ბევრი ტურისტი სტუმრობს და ორ ქვეყანას მაღალი დონის მეგობრობა აკავშირებს, რაც მომავალში კიდევ უფრო გაღრმავდება.
ავსტრიაში საქართველოს საპატიო კონსულის გუნთერ კარლ ბონის განცხადებით, საქართველო და ავსტრია წარმატებით თანამშრომლობენ ისეთ სფეროებში, როგორიც არის ტურიზმი და კულტურა. ორი ქვეყანა აქტიურად მუშაობს ხალხთაშორისი ურთიერთობების განვითარებაზეც. გუნთერ კარლ ბონის თქმით, ავსტრიაში საქართველოს საპატიო საკონსულო შესანიშნავად თანამშრომლობს ვენაში საქართველოს საელჩოსთან.
საქართველოსა და ირლანდიას შორის მტკიცე პოლიტიკურ და ბიზნეს ურთიერთობებზე ისაუბრა ირლანდიაში საქართველოს საპატიო კონსულმა ჯეიმს ჯუდ ბრიჯმენი. მისი განცხადებით, ორ ქვეყანას აქვს ძალიან კარგი შესაძლებლობები თანამშრომლობის განვითარებისთვის ისეთ სფეროებში , როგორიც არის ტექნოლოგიები, ტურიზმი თუ სოფლის მეურნეობა.
„საქართველოსთან ჩვენ გვაქვს ძალიან მტკიცე ორმხრივი ურთიერთობები. საქართველო-ირლანდიის ბიზნეს საბჭოს შექმნის პროექტს ირლანდიაში საქართველოს ელჩი, გიორგი ზურაბაშვილი და მე ვხელმძღვანელობთ. ბიზნეს საბჭო გასულ წელს შეიქმნა და ჩვენ დიდ ხელშეწყობას და მტკიცე მხარდაჭერას ვგრძნობთ როგორც ირლანდიის, ასევე საქართველოს მთავრობისგან ბიზნეს ურთიერთობების განვითარების კუთხით”, – განაცხადა ჯეიმს ბრიჯმენმა.
აღსანიშნავია, რომ ღონისძიებას საქართველოს აღმასრულებელი ხელისუფლების წარმომადგენლები დაესწრნენ.
ავსტრიაში, ირლანდიასა და ისრაელში საქართველოს საპატიო კონსულებმა ეკონომიკის, ტურიზმის და ბიზნეს სფეროში საქართველოს დიდ პოტენციალზე ისაუბრეს
2022/10/02 14:46:24
კომენტარები
ნანახია: 174 ჯერ