საპარლამენტო ოპოზიციაში დეოლიგარქიზაციის შესახებ უკრაინული კანონის საქართველოში ინიცირებას არ ეთანხმებიან. „გირჩის“ წევრის, ვახტანგ მეგრელიშვილის თქმით, მოთხოვნა დეოლიგარქიზაციის შესახებ ბიძინა ივანიშვილის გამო გაჩნდა, ეს კანონი კი მას არ ეხება. გამოსავალს მეგრელიშვილის ივანიშვილის პოლიტიკაში დაბრუნებაში ხედავს.
„საუბარია ბიძინა ივანიშვილზე, რომელსაც ერთპიროვნულად შეუძლია მმართველი პოლიტიკური ძალის მართვა. მაგრამ ის არანაირი ოლიგარქი არ არის. იმ გაგებით, რა გაგებითაც უკრაინული კანონმდებლობაა წარმოდგენილი, ბიძინა ივანიშვილს ის საერთოდ არ ეხება. თუ მართლა გვინდა, რომ პოლიტიკური პრობლემა გადავწყვიტოთ და ევროპელებსაც არ ჰქონდეთ არანაირი კითხვა ამასთან დაკავშირებით, მაშინ ბიძინა ივანიშვილი საჯარო პოლიტიკაში უნდა დაბრუნდეს“, – აცხადებს მეგრელიშვილი.
პარლამენტის იურიდიულ საკითხთა კომიტეტში დეოლიგარქიზაციასთან დაკავშირებით მსჯელობენ. სამუშაო ჯგუფის წევრები დღეს მოსაზრებებს ცვლიან. იმისათვის, რომ ევროპული რეკომენდაციების მეხუთე პუნქტი შესრულებულად ჩაითვალოს, პარლამენტმა შესაბამისი კანონი უნდა მიიღოს. პროცესს ამ დრომდე ბოიკოტს უცხადებენ „ნაციონალური მოძრაობა“, „ლელო“ და „სტრატეგია აღმაშენებელი“.