პრემიერ-მინისტრის, ირაკლი ღარიბაშვილის განცხადებით, ოპოზიციის მთავარი სურვილი გასაგებია – ისინი ვერ პატიობენ ბიძინა ივანიშვილს, რომ 2012 წლის 1 ოქტომბერს მან დაასრულა დიქტატურა, ადამიანების ჩაგვრა და ქვეყნის განადგურება. ამის შესახებ მან დეოლიგარქიზაციის კანონთან დაკავშირებით დასმულ კითხვაზე განაცხადა.
„აქვე მინდა ვთქვა, რომ მათ მოუწევთ შეგუება ამ რეალობასთან. ქვეყანაში გვაქვს წარმატებული საშინაო და საგარეო პოლიტიკა. ყველა მიღწევა, რომელიც უკავშირდება საქართველოს წარმატებას ევროკავშირისკენ თუ ნატოსკენ გზაზე, უკავშირდება „ქართულ ოცნებას“ – ასოცირების შეთანხმება, უვიზო რეჟიმი, თავისუფალი ვაჭრობა, ახლა უკვე ოფიციალურად შეტანილი განაცხადი ევროკავშირის წევრობაზე და მიღებული ევროპული პერსპექტივა. ამაზე ვერ ვიოცნებებდით „ნაცმოძრაობის“ მმართველობის დროს. ეს არის ხელშესახები შედეგები. რაც შეეხება დეოლიგარქიზაციის კანონს, ჩვენ ძალიან ბევრი ოლიგარქი და ოლიგარქიისკენ მიდრეკილი ყოფილი თუ მოქმედი პოლიტიკოსი და ბიზნესმენი ვიცით. ჩვენ ავიღეთ უკრაინული მოდელი, რომელიც მოწონებულია ევროკავშირის მიერ, და ამ კანონს მივიღებთ“, – განაცხადა ღარიბაშვილმა.