ჩვენს ჯარს, ჩვენს მაგარ ბიჭებს ფული მოჰპარეს და ახლა „ნაციონალურ მოძრაობაში“ წაგებული ომით გამდიდრებული მინისტრის, კეზერაშვილის ფულზეა საუბარი, რომელიც ვერ გაიყვეს და კლანებს შორის დაპირისპირება მიმდინარეობს, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.
ჯაფარიძე-ხოშტარია-ვაშაძის გაერთიანებაზე საუბრისას, ზარქუამ აღნიშნა, რომ მას მოლოდინი არ აქვს, რომ რაიმე რეალური ძალა შეიქმნება.
„მათ ცალკე „ტროიკა“ გამოეყო, რომელთაც თავიანთი დაფინანსება აქვთ – ხოშტარიამ ხომ რუსეთში ეს „კანალი“ გაჭრა და რუსული ფულით ფინანსდება. არ ვიცი, „ნაციონალურ მოძრაობაში“ როგორ ჩამოყალიბდებიან, როგორც ჩანს, გიგა ბოკერიას მეტი ფანტაზია აქვს. ესენი ყველა ერთნი არიან. ვინც აქცენტირებულია არა ევროინტეგრაციაზე და ქვეყანას ხელი გაუმართოს, გვერდში დაუდგეს, არამედ ქაოსზე, დაძაბულობაზე, რევოლუციურ სცენარებზე, ისინი ჩვენთვის ყველა ერთია და რადიკალებს ვუწოდებთ. მათ მიერ ჩატარებულ კვლევებშიც კი, 12 პროცენტი აქვს „ნაციონალურ მოძრაობას“, დანარჩენებს თითო-თითო და ამათგან რა უნდა გამოვიდეს.
მოლოდინი არ მაქვს, რაიმე რეალური ძალა შეიქმნება, პირველი მეორეს ჩაუმხანაგდება, მეორე – მესამეს, ეს ყველაფერი ნანახი გვაქვს. ჩვენთვის მეათეხარისხოვანია გიჟი ჯაფარა და ვაშაძე რა დამოკიდებულებაში იქნებიან „ნაცმოძრაობაში“ ხელმოცარულებთან. ჯალათებზე, ვისზეც იდგა პოლიტიკური ორგანიზაცია, მერაბიშვილებზე, ახალაიებზე, ისევ ეს გუნდია და თავადაც განაცხადეს. მთავარ მხარდამჭერად მერაბიშვილი რომ გეყოლება და მის იმედად იქნები, დანარჩენ სხვა მწვალებლებზე რა უნდა თქვა? აქ არის ბრძოლა კეზერას ფინანსებზე“, – განაცხადა ირაკლი ზარქუამ.