2023 წლის ბიუჯეტის დაკორექტირებულ ვერსიასპარლამენტი დღეს განიხილავს. პრემიერმინისტრ ირაკლი ღარიბაშვილის ინიციატივით, დარედაქტირებულ ვერსიაში არაერთი სოციალური პროგრამაა გათვალისწინებული. მათ შორის, სოციალურად დაუცველი ბავშვების დახმარების ზრდა, ამავე სტატუსის მქონე, შრომისუნარიანი მოქალაქეების დასაქმების პროგრამები და დეკრეტული შვებულების ანაზღაურების ზრდა.
ამ თემებზე “კვირა” ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილეს, თამილა ბარკალაიას ესაუბრა. მან ბიუჯეტში გათვალისწინებული სოციალური პროგრამების მნიშვნელობაზე გაამახვილა ყურადღება.
„სოციალურად დაუცველ ოჯახებში მცხოვრები ბავშვები 2021 წლის 1-ელი ივლისიდან უკვე იღებენ გაზრდილ, 150 ლარის ოდენობის გასაცემელს. მნიშვნელოვანი და აღსანიშნავია, რომ წელს არა მარტო გასაცემელი გაიზარდა, არამედ ის კრიტერიუმებიც შეიცვალა, რომლებიც ამ გასაცემლის აღების წინაპირობაა.თუ მანამდე 100 ათას ქულაზე ნაკლები იყო ბავშვის ბენეფიტის გაცემის წინაპირობა, 1-ელი ივლისიდან 120 ათას ქულამდე გაიზარდა და ეს მიზანმიმართული იყო, რომ მეტი ბავშვისთვის გაგვეცა სოციალური დახმარება. ეს არის ის დანამატი, რომელიც, გარდა სოციალური დახმარებისა, გაიცემა იმ ბავშვებზე რომლებიც ამ ოჯახებში ცხოვრობენ. პრემიერის ინიციატივით, სოციალური დახმარების მიმღებ ოჯახში მცხოვრები ბავშვის დახმარება 2023 წლის 1-ელი ივლისიდან 50 ლარით იზრდება და 200 ლარი ხდება“, – განაცხადა თამილა ბარკალაიამ.
აღსანიშნავია, რომ, დღეის მდგომარეობით, ამ სოციალური გასაცემლით 220 ათასი ბავშვი სარგებლობს. ამ პროგრამის ბიუჯეტი 2023 წელს 465 მილიონი ლარი იქნება, 2024 წელს კი 530 მილიონი ლარი იქნება გათვალისწინებული.
„ეს ერთ-ერთი უმნიშვნელოვანესი გადაწყვეტილებაა, რადგან როდესაც სიღარიბის დაძლევაზე არის საუბარი, ბავშვთა სიღარიბე ყოველთვის გაცილებით მაღალია, ვიდრე სტანდარტული სიღარიბის მაჩვენებელი, გამომდინარე იქიდან, რომ ბავშვის მოწყვლადობა უფრო მაღალია დღეს.შესაბამისად, მიმაჩნია, რომ უფრო ძლიერი მექანიზმი და ბერკეტია ამ სიღარიბის დაძლევის ან სიღარიბის პრევენციის. ასევე, ერთ-ერთი მნიშვნელოვანი მიმართულებაა დასაქმების პროგრამა სოციალურად დაუცველთა სტატუსი მქონე ადამიანებისთვის. თუ ოჯახის მოწყვლადობის ქულა 65 000 ან მასზე ნაკლებია სოციალურ დახმარებას არამარტო ბავშვი, არამედ ოჯახის ყველა წევრი იღებს. გამომდინარე იქიდან, რომ ჩვენთვის მნიშვნელოვანია ბავშვების და ბავშვიანი ოჯახების დახმარება, ნებისმიერი სოციალური გასაცემელი არ იქნება ჩამნაცვლებელი დასაქმებისა და აქედან მიღებული ხელფასის. აქედან გამომდინარე, ძალიან მნიშვნელოვანია ის დასაქმების პროგრამები, რასაც სახელმწიფო სთავაზობს სოციალურად დაუცველ შრომისუნარიან პირებს. პოლიტიკა არის ისე აგებული, რომ იზრდება ბავშვების დახმარება და ამავდროულად, ხდება სოციალურად დაუცველი, შრომისუნარიანი პირების წახალისება დასაქმებისკენ. სწორედ ამ მიზანს ემსახურება საზოგადოებრივი სამუშაოების პროგრამა, რომელიც პრემიერის ინიციატივით, 1-ელი მარტიდან მოქმედებს და, დღეის მდგომარეობით, 30 000-მდე ბენეფიციარი არის ჩართული საზოგადოებრივ სამუშაოებში. პარალელურად, მუშაობა მიმდინარეობს სოციალურად დაუცველებთან და მათი უნარების შესაბამისად მათთვის შეთავაზება ხდება შრომის ბაზარზე არსებული ღია ვაკანსიების”, – განაცხადა თამილა ბარკალაიამ.
ჯანდაცვის მინისტრის მოადგილემ დეკრეტული შვებულების ანაზღაურების ზრდაზეც გაამახვილა ყურადღება, რომელიც 2023 წლის 1-ელი იანვრიდან ამოქმედდება. თამილა ბარკალაიას თქმით, შრომითი უფლებების გაუმჯობესებაზე სახელმწიფო მუშაობას მომავალშიც გააგრძელებს. „ანაზღაურებადი დეკრეტული შვებულების უზრუნველყოფა სახელმწიფოს ვალდებულებაა. აღსანიშნავია, რომ 2014 წლის შემდეგ დეკრეტული შვებულების ანაზღაურება არ გაზრდილა და იყო არაუმეტეს 1000 ლარის. 2023 წლის პირველი იანვრიდან კი გაორმაგდება დეკრეტული ანაზღაურება. ამ წლების განმავლობაში, საერთაშორისო სტანდარტებთან მივაახლოვეთ, რაც გულისხმობს, რომ ბავშვის მოვლის გამო დეკრეტული შვებულებით სარგებლობის უფლება მიეცა როგორც ქალს ისე მამაკაცს. ბუნებრივია, შემდეგი ნაბიჯი არის შესაბამისი ანაზღაურების მიცემა. ეს არის უმნიშვნელოვანესი წინ გადადგმული ნაბიჯი, რომელიც ქალის შრომით უფლებებს და მით უმეტეს, დეკრეტის პერიოდში შრომით უფლებებს შეეხება. აქვე აღვნიშნავ, რომ გაცილებით მაღალი არის დეკრეტული ანაზღაურება საჯარო სექტორში დასაქმებულთათვის, ეს არის 6 თვის განმავლობაში ხელფასის 100%-ით ანაზღაურება. მთავრობის გადაწყვეტილებით, ანალოგიური მიდგომა არის სკოლის მასწავლებლების მიმართაც, რომელიც უკვე 1-ელი იანვრიდან ამოქმედდება. პედაგოგებსაც ხელფასის 100% აუნაზღაურდებათ დეკრეტის დროს და ესეც უმნიშვნელოვანესი გადაწყვეტილებაა და ჩვენ მომავალშიც გავაგრძელებთ დეკრეტული ანაზღაურების მიმართულებით, ზოგადად, შრომითი უფლებების გაუმჯობესებაზე მუშაობას”, – აღნიშნა ბარკალაიამ.