ერთადერთი დამაბრკოლებელი, რამაც შეიძლება ძალიან მნიშვნელოვანი საფრთხე შეუქმნას პაციენტ სააკაშვილის მდგომარეობას, ეს არის მისი ჯანმრთელობის მდგომარეობის ასეთი პერმანენტული და პერსისტირებული პოლიტიზირება. ექიმობის 30 წელზე მეტი სტაჟი მაქვს და მსგავსი არ მინახავს და არც კი გამიგონია, არც კი წამიკითხავს, რომ კლინიკური დიაგნოზის დასაზუსტებლად და კონსილიუმის შესადგენად ასეთი მრავალსერიიანი რაღაც იმართებოდეს, – ამის შესახებ „ქართული ოცნების” დეპუტატმა, დავით სერგეენკომ ყოფილი პრეზიდენტის, მიხეილ სააკაშვილის ჯანმრთელობის მდგომარეობაზე საუბრისას განაცხადა.
მისი შეფასებით, თუკი სააკაშვილის დიაგნოზები სასჯელის გადავადებასთან დაკავშირებით კომისიურ განხილვას დაექვემდებარება, არანაირი შეფერხება, მით უმეტეს, პოლიტიკური ბარიერი არ იქნება იმისა, რომ საკითხი დადგენილი წესით იქნას განხილული.
„არსებული მოქმედი პროცედურა ასეთია, რომ არის დაავადებათა და მდგომარეობათა საკმაოდ მოცულობითი ჩამონათვალი და თუ ამ კრიტერიუმებში ამა თუ იმ პაციენტის ჯანმრთელობის მდგომარეობა შედის, ის კომისიურ განხილვას ექვემდებარება. არაერთი შემთხვევა ყოფილა, პრეცედენტული სისტემა არის ასეთი. მიხეილ სააკაშვილის შემთხვევაში ეს დიაგნოზები რამდენად შეესაბამება არსებულ პროცედურას ამას ვერ გეტყვით, მაგრამ გარწმუნებთ, რომ თუკი არის შესაბამისობა, არანაირი შეფერხება, მით უმეტეს, პოლიტიკური ბარიერი არ იქნება, რომ ეს ყველაფერი კომისიურად, დადგენილი წესით იქნას განხილული.
ერთადერთი ფაქტორი, რაც ამ ადამიანის ჯანმრთელობას რეალურ საფრთხეს უქმნის, ეს არის ამ საკითხის პოლიტიკური ანგაჟმენტი, როდესაც არ აცდიან ექიმებს. ექიმები ჩუმად არიან და კლინიკურ მედიცინაზე ლაპარაკობენ ადვოკატები, პოლიტიკოსები და არასამთავრობო სექტორი. ერთადერთი დამაბრკოლებელი, რამაც შეიძლება ძალიან მნიშვნელოვანი საფრთხე შეუქმნას პაციენტ სააკაშვილის მდგომარეობას, ეს არის მისი ჯანმრთელობის მდგომარეობის ასეთი პერმანენტული და პერსისტირებული პოლიტიზირება. ექიმობის 30 წელზე მეტი სტაჟი მაქვს და მსგავსი არ მინახავს და არც კი გამიგონია, არც კი წამიკითხავს, რომ კლინიკური დიაგნოზის დასაზუსტებლად და კონსილიუმის შესადგენად ასეთი მრავალსერიიანი რაღაც იმართებოდეს. ეს ბევრად სწრაფად ხდება ხოლმე. ოღონდ აცადონ ამ ექიმებს მუშაობა, ადგილობრივებსაც და ჩამოსულებსაც“, – განაცხადა სერგეენკომ.