როგორც კი საქართველო ასეთ ნაბიჯს გადადგმას, ეს ნიშნავს მხარედ დაფიქსირებას სამხედრო შეიარაღებულ კონფლიქტში, რაც ომის რისკს ასმაგად ზრდის და საქართველოს ომის რისკის გადატანა ძალიან გაუჭირდება, – ამის შესახებ ფრაქცია „ქართული ოცნების” თავმჯდომარე მამუკა მდინარაძემ გადაცემა „იმედი LIVE“-ში განაცხადა, რითაც გამოეხმაურა უკრაინის საქმეთა დროებითი რწმუნებულის, ანდრეი კასიანოვის ბრიფინგს.
„ომის ნარატივი გახსოვთ – პირველი ტალღა იყო ძალიან მძლავრი, თავისი თვითმფრინავების გაგზავნის მოთხოვნით და ქვეყნის შიგნით და გარეთ ეს მოთხოვნა ძალიან მკაფიოდ იყო გახმოვანებული, რაც ნიშნავდა ომში პირდაპირ ჩართვას. მიზანი იყო – მხარედ დაფიქსირდეს საქართველო სამხედრო შეიარაღებულ კონფლიქტში. ახლა, როცა შედარებით მინელდა ომის მოთხოვნის ტალღა, როდესაც ქართული საზოგადოების უმრავლესობა ჩამოყალიბდა მშვიდობაზე, (და კი, მშვიდობაა ის უპირატესი უფლება რაც შეიძლება მოითხოვო და მიიღო ხელისუფლებისგან), დღეს როცა მიხვდნენ, რომ ეს პიარკამპანია ჩავარდა, ეცადნენ ახალი ტალღის აგორებას და ბოლო დღეებში ბევრი მსგავსი მესიჯი მოვისმინეთ, რაც დააგვირგვინა გაჭრილად, პირდაპირმა მოთხოვნამ შეიარაღების გადაცემის, რაც ცალსახად ნიშნავს: როგორც კი საქართველო ასეთ ნაბიჯს გადადგმას, ეს ნიშნავს მხარედ დაფიქსირებას სამხედრო შეიარაღებულ კონფლიქტში, რაც ომის რისკს ასმაგად ზრდის და საქართველოს ომის რისკის გადატანა ძალიან გაუჭირდება. არავინ საუბრობს იმაზე, რომ უკრაინელი ბავშვები უკრაინულად სწავლობენ, ჰუმანიტარულ დახმარებაში ნომერ პირველები რომ ვიყავით, არავინ საუბრობს, რა პოლიტიკურ მხარდაჭერას ვუცხადებთ ამ ხალხს, მხოლოდ ერთი რაღაც გამოვარდა და ეს ერთი ხარვეზი სპეკულაციის საგანი გახდა“, – განაცხადა მან.
მდინარაძე ასევე გამოეხმაურა კასიანოვის განცხადებას, უკრაინის მიერ საქართველოსთვის გაწეული დახმარებების თაობაზე.
„რაც შეეხება 2008 წელს, რაც თქვა კასიანოვმა. ჩვენ არ უნდა ვაყვედრიდეთ რამეს ერთმანეთს. არცერთი რეაქციას ჩვენი მხრიდან არ ყოფილა პროაქტიული. ჩვენ არ დაგვიწყია არაფერზე საუბარი აბსოლუტურად. 90-იანი წლებში ძალიან პოზიტიური როლი გვახსოვს ჩვენ უკრაინელების. მადლობა უნდა ვუთხრათ, ვიდრე ცოცხლები ვიქნებით, რამდენი წელიც არ უნდა გავიდეს. მათ შორის მადლობა უნდა ვუთხრათ მათ 2008 წელს, რომ მოგვყიდეს იარაღი. ოღონდ ომის დღეებში ეს არ ხერხდებოდა. ისე გამოდის, კონტექსტი ისეთია, რომ თითქოს ომის დღეებში გადმოგვცეს იარაღი. ეს ასე არ ყოფილა. არავის ამაზე არ უსაუბრია დღევანდელ დღემდე, ვიდრე არ გაჩნდა საფრთხე, რომ რაღაც სპეკულაციურ მესიჯს შეუძლია ხალხი შეცდომაში შეიყვანოს. იყვნენ ინსტრუქტორები ომამდე, რომლებსაც ეძლეოდათ ხელფასი და რომლებმაც გარკვეული შეიარაღებაც გადმოგვცეს. როცა საუბრობენ, რომ ჩვენ დაგეხმარეთ – კი ბატონო პოლიტიკური მხარდაჭერა იყო, პრეზიდენტი იყო ჩამოსული და მადლობა ამისთვის, მაგრამ არ უნდა გაახმოვანო ისეთი მესიჯები, რაც საქართველოს მოსახლეობას შეცდომაში შეიყვანს. საქართველოს ხელისუფლება და საქართველო აკეთებს მაქსიმალურს და გადის შესაძლებლობების ზღვარზე და ზღვარს მიღმა [უკრაინის დასახმარებლად].
მხარედ დაფიქსირების თავი შეიძლება დღეს ჰქონდეს აშშ-ს და ასეც იქცევა. სამხედრო მხარდაჭერას უცხადებს უკრაინას, აფინანსებს ამ მიმართულებითაც. არანაირი რეალური მოლოდინი იმისა, რომ ჩვენ ისეთ სამხედრო ტექნიკას და საბრძოლო მასალას გადავცემთ, რომ ამოისუნთქავს უკრაინის ჯარი, ეს ხომ სიგიჟეა, უბრალოდ მიზანი არის, რომ ახალი ტალღა ამოწიონდა წამოვიდეს ზეწოლა საქართველოს ხელისუფლებაზე, რომ რამენაირად დაფიქსირდეს საქართველო როგორც მხარე შეიარაღებული კონფლიქტის და ეს ქვეყანა ჩაერთოს ომში, აქ გაიხსნას მეორე ფრონტი“, – განაცხადა მდინარაძემ.