შინაგან საქმეთა სამინისტროს ელექტრონული დაკვირვებისა და სამგზავრო დოკუმენტების ინსპექტირებისთვის საჭირო თანამედროვე აღჭურვილობა გადაეცა.
ღონისძიება დღეს შინაგან საქმეთა სამინისტროში გაიმართა, სადაც მინისტრი გიორგი მღებრიშვილი ევროკომისიის სამეზობლო პოლიტიკისა და გაფართოების მოლაპარაკებათა საკითხებში გენერალური დირექტორატის ხელმძღვანელს ქრისტიან დანიელსონს შეხვდა.
შეხვედრაზე მხარეებმა ევროკავშირის მიერ დაფინანსებული პროგრამის „მეტი მეტისთვის“ ფარგლებში საქართველოს შინაგან საქმეთა სამინისტროსთვის შეძენილი აღჭურვილობის გადმოცემის საკითხები განიხილეს და სასაზღვრო უსაფრთხოების გაძლიერების კუთხით ევროკავშირთან თანამშრომლობის სამომავლო გეგმებზე იმსჯელეს.
შეხვედრის დასრულების შემდეგ აღჭურვილობის გადაცემის ცერემონია გაიმართა. მიგრაციის საერთაშორისო ორგანიზაციამ, ევროკავშირის ფინანსური მხარდაჭერით, საქართველოს შინაგან საქმეთა სამინისტროს ელექტრონული დაკვირვებისა და სამგზავრო დოკუმენტების ინსპექტირებისთვის საჭირო თანამედროვე აღჭურვილობა გადასცა.
„დასავლური ღირებულებები, დასავლური სტანდარტებისკენ სწრაფვა ჩვენი არჩევანია. საქართველოს მთავრობა და შინაგან საქმეთა სამინისტრო ძალისხმევას არ იშურებს სახელმწიფო საზღვრის დაცვის გაძლიერების მიმართულებით. ამ პროცესში ევროკავშირი და პარტნიორი ორგანიზაციები ჩვენს ქვეყანას მნიშვნელოვან მხარდაჭერას უწევენ. აღნიშნული მხარდაჭერის ფარგლებში საზღვრის ინტეგრირებული მართვის პროცესში ჩართული დანაყოფებისთვის არაერთი ინფრასტრუქტურული და ტექნოლოგიური განვითარების პროგრამა განხორციელდა. სწორედ ამ წარმატებული თანამშრომლობის მაგალითია დღევანდელი ღონისძიება, რომელიც მიზნად ისახავს შინაგან საქმეთა სამინისტროსთვის ელექტრონული დაკვირვების სისტემებისა და სამგზავრო დოკუმენტების მეორადი ინსპექტირების დანადგარების გადმოცემას“, – განაცხადა ღონისძიებაზე შინაგან საქმეთა მინისტრმა გიორგი მღებრიშვილმა.
მან სტუმრებთან ერთად დაათვალიერა ევროკავშირის მიერ გადმოცემული აღჭურვილობა: ერთობლივი მართვის სიმულაციური ცენტრი, რადიო კომუნიკაციის სისტემები, სათვალთვალო კამერები და დოკუმენტების ინსპექტირების აპარატურა.
სამგზავრო დოკუმენტების ინსპექტირების უახლესი აპარატურა მთელი ქვეყნის მასშტაბით 10 სასაზღვრო გამტარ პუნქტში განთავსდება.