შინაგან საქმეთა სამინისტროს საგანგებო სიტუაციათა მართვის სააგენტოს თბილისის სამმართველოს უფროსის მოადგილის, დავით გელაშვილის ინფორმაციით, სავაჭრო ცენტრ „ბავშვთა სამყაროში“ მომხდარი ხანძრის შედეგად 13 000 კვადრატული მეტრია დამწვარი. მისი თქმით, დამწვარ ტერიტორიაში შედის როგორც თვითონ შენობა, ასევე, შენობის მიმდებარე ბაზრობების ტერიტორია. რაც შეეხება ცეცხლის კერებს, მისი თქმით, ამ ეტაპზე, მიმდინარეობს ცალკეული ლოკალური კერების დაქრობითი სამუშაოები, ადგილზე მობილიზებულია 7 სახანძრო მანქანა და 80-მდე მეხანძრე-მაშველი.
დავით გელაშვილის განმარტებით, უსაფრთხოების გამო, შენობაში შესვლა კატეგორიულად აკრძალულია და ნებისმიერ წამს შესაძლებელია, რაიმე ჩამოვარდეს ან ჩამოინგრეს.
„შენობის არამდგრადი მდგომარეობის გამო, შიგნით შესვლა კატეგორიულად აკრძალულია, არ არის გამორიცხული, დარჩენილი იყოს ცალკეული ლოკალური კერები, 13 000 კვადრატული მეტრის გაკონტროლება კვადრატულ მეტრებად შეუძლებელია. არსებული ტექნიკა და მეხანძრე-მაშველები აქ სწორედ უსაფრთხოების გამო იმყოფებიან. დაზარალებულების შეშვება-არშეშვება ჩემს კომპეტენციას აღემატება, თუმცა ვაცხადებ, რომ შენობაში შესვლა არის ძალიან საშიში, რადგან შენობა არ არის უსაფრთხო და ნებისმიერ წამს შესაძლებელია, რაიმე ჩამოვარდეს ან ჩამოინგრეს. უსაფრთხოების თვალსაზრისით, შეუძლებელია ამ შენობაში შესვლა“, – განაცხადა დავით გელაშვილმა.
“ბავშვთა სამყაროში“ გაჩენილი ხანძრის შედეგად 13 000 კვადრატული მეტრია დამწვარი
2017/02/01 13:47:06
კომენტარები
ნანახია: 1323 ჯერ