კიდევ უფრო გააქტიურდება ჩვენი მუშაობა ჩვენს პარტნიორებთან იმისთვის, რომ გიორგი გიუნაშვილის გათავისუფლებას მივაღწიოთ, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა ჟურნალისტებს ოკუპირებული ცხინვალის ე.წ. სასამართლოს მიერ საქართველოს მოქალაქე გიორგი გიუნაშვილისთვის 20 წლით თავისუფლების აღკვეთის მისჯის კომენტირებისას განუცხადა.
მისივე თქმით, გიუნაშვილის დაკავების დღიდან, ქართული მხარე მისი გათავისუფლების საკითხს ინციდენტების პრევენციისა და მათზე რეაგირების მექანიზმების ფარგლებში გამართულ ყველა შეხვედრაზე აყენებდა.
”ჩვენ რა თქმა უნდა ვერ და არ შევალთ ამ ე.წ. გადაწყვეტილების, მით უმეტეს გაუგებარი ბრალდებების განხილვაში. ცალსახაა, რომ ადამიანი არის უკანონოდ დაკავებული.
როგორც ინციდენტების პრევენციისა და მათზე რეაგირების მექანიზმების ფარგლებში, ასევე ყველა სხვა შესაბამისი ფორმატისთვის, ეს ერთ-ერთი მთავარი საკითხია ქართული მხარისთვის. კიდევ უფრო გააქტიურდება ჩვენი მუშაობა პარტნიორებთან იმისთვის, რომ მის გათავისუფლებას მივაღწიოთ”, – განაცხადა ქეთევან ციხელაშვილმა.