საქართველოს თავდაცვის მინისტრი ლევან იზორია და ბრიგადის გენერალი ვლადიმერ ჩაჩიბაია დაბა ჰოჰენფელზში, აშშ-ის ევროპის სარდლობის მე-7 არმიის საწვრთნელ ბაზას ესტუმრნენ.
საქართველოს თავდაცვის სამინისტროს ინფორმაციით, დელეგაციას აშშ-ის არმიის ევროპული ჯარების სარდალმა, გენერალ-ლეიტენანტმა ბენ ჰოჯესმა და საწვრთნელი ბაზის მეთაურმა, ბრიგადის გენერალმა ანტონიო აგუტომ უმასპინძლეს.
უწყების ინფორმაციით, ამერიკელ გენერლებთან შეხვედრაზე თავდაცვის მინისტრმა საქართველოს შეიარაღებული ძალების თავდაცვითი შესაძლებლობების განვითარებაში აშშ-ის ევროპის სარდლობის მნიშვნელოვან წვლილზე გაამახვილა ყურადღება და აღნიშნა, რომ აშშ-საქართველოს შორის უსაფრთხოების სფეროში გაფორმებული სამწლიანი თანამშრომლობის ჩარჩო-დოკუმენტი ორმხრივი თანამშრომლობის გრძელვადიან ამოცანებს განსაზღვრავს და მტკიცე თავდაცვითი შესაძლებლობების განვითარებას შეუწყობს ხელს.
ამერიკელ გენერლებთან შეხვედრაზე თავდაცვის მინისტრმა საქართველოს შეიარაღებული ძალების თავდაცვითი შესაძლებლობების განვითარებაში აშშ-ის ევროპის სარდლობის მნიშვნელოვან წვლილზე გაამახვილა ყურადღება და აღნიშნა, რომ აშშ-საქართველოს შორის უსაფრთხოების სფეროში გაფორმებული სამწლიანი თანამშრომლობის ჩარჩო-დოკუმენტი ორმხრივი თანამშრომლობის გრძელვადიან ამოცანებს განსაზღვრავს და მტკიცე თავდაცვითი შესაძლებლობების განვითარებას შეუწყობს ხელს. მხარეებმა საქართველოს თავდაცვის მზადყოფნის პროგრამის ამოქმედების გეგმებიც განიხილეს, რაც საქართველოში ჰოჰენფელზის მსგავსი საბრძოლო მომზადების ცენტრის მშენებლობას ითვალისწინებს. მზადყოფნის პროგრამის შემდგომი დეტალების შესაჯერებლად კი, საქართველოს უახლოეს მომავალში ამერიკელი გენერალი ესტუმრება.
„გენერალ ჰოჯესთან ერთად ამბიციური გეგმები განვიხილეთ, რომელიც ამ წლის ფარგლებში უნდა განვახორციელოთ. ეს ეხება საქართველოს თავდაცვის მზადყოფნის პროგრამის ამოქმედებას, რომელიც ითვალისწინებს ჰოჰენფელზის მსგავსი საბრძოლო მომზადების ცენტრის მშენებლობას ჩვენს სტრატეგიულ პარტნიორებთან ერთად საქართველოში. ეს დღე მართლაც ისტორიულია. ჩვენ ამ პროგრამის დეტალები განვიხილეთ, შევჯერდით და ახლო მომავალში საქართველოში ველოდებით ბრიგადის გენერალს, რათა პროგრამის განხორციელების თვალსაზრისით შემდგომი დეტალები გავიაროთ“, – განაცხადა ლევან იზორიამ.
აშშ-ის არმიის ევროპული ჯარების სარდალმა, გენერალ-ლეიტენენტმა ბენ ჰოჯესმა კი, თავდაცვის მინისტრს და ბრიგადის გენერალს ვლადიმერ ჩაჩიბაიას, 21-ე სარდლობის კონცეფციის შესახებ ინფორმაცია წარუდგინა და ქართველი მშვიდობისმყოფელების მომზადების დონეს, რომელიც ამჟამად ავღანეთისთვის გადასროლისწინა წვრთნას ჰოჰენფელზში გადიან, მაღალი შეფასება მისცა. ამერიკელმა გენერალმა ქართველ სამხედროებს სანდო პარტნიორები უწოდა და თავდაცვის უწყებაში მიმდინარე ტრანსფორმაციის პროცესი მოიწონა.
„თავდაცვის სამინისტროს ხელმძღვანელი პირები უწყების ტრანსფორმაციას ინოვაციურად უდგებიან. მათ შეუძლიათ უზრუნველყონ საუკეთესო თავდაცვითი შესაძლებლობები საქართველოსთვის. როგორც ყოველთვის, ახალგაზრდა ქართველმა ჯარისკაცებმა დღესაც დიდი შთაბეჭდილება მოახდინეს ჩემზე. კონტინგენტი ავღანეთის მისიაში გასამგზავრებლად ემზადება. ქართველი სამხედრო მოსამსახურეები შესანიშნავად არიან მომზადებულნი. ისინი სწრაფად აზროვნებენ და კარგად აქვთ გამომუშავებული გუნდური მუშაობის პრინციპები. მე მათ მიმართ უდიდესი ნდობა გამაჩნია. ამერიკელებმა ვიცით, რომ ქართველები ამაყი და სანდო პარტნიორები არიან. ვფიქრობ, რომ საქართველო ლიდერი ქვეყანაა ისეთ რეგიონში, სადაც უამრავი გამოწვევა არსებობს. ის არის ერთგვარი პორტალი ევროპისკენ დანარჩენი ქვეყნებისთვის. საქართველოს აქვს შესაძლებლობა წინ გაუძღვეს სხვა ქვეყნებს და უზრუნველყოს სტაბილურობა კავკასიასა და შავი ზღვის რეგიონში. თავდაცვის მინისტრისა და გენერალური შტაბის უფროსთან შეხვედრის შემდეგ, ოპტიმიზმით სავსე ვარ მათი კურსის მიმართ. ჩვენ კვლავ გავაგრძელებთ ქართველებთან აქტიურ თანამშრომლობას. გრაფენბერგისა და ჰოჰენფელზის ბაზების მეთაური უახლოეს მომავალში საქართველოში მიემგზავრება, რათა ადგილზე გაეცნონ საქართველოს წვრთნების ცენტრის მშენებლობის პროცესს. ჩემი აზრით, ქართულ-ამერიკული ურთიერთობები დღეს ისეთი ძლიერია, როგორც არასდროს და ეს ასეც გაგრძელდება. ამერიკელებს მოსწონთ ყოფნა იმ ხალხთან, რომლებსაც უყვართ თავისუფლება და რომლებიც იბრძვიან თავიანთი თავისუფლებისთვის“, – აღნიშნა აშშ-ის არმიის ევროპული ძალების სარდალმა.
ჰოჰენფელზის სამხედრო ბაზაზე ვიზიტის ფარგლებში, ოპერაციების მართვის ცენტრში ბრიგადის გენერალმა ანტონიო აგუტომ სტუმრებთან ოპერაციების მართვის ცენტრის მუშაობის პრინციპებზე ისაუბრა. მოგვიანებით, თავდაცვის მინისტრმა და გენერალური შტაბის უფროსმა აშშ-ის გაერთიანებული მრავალეროვანი მზადყოფნის ცენტრში (JMRC) გადაინაცვლეს, სადაც სწავლებების დროს სამხედროების მოქმედებების შეფასების მეთოდებს გაეცნენ.
გერმანიაში ვიზიტის ბოლოს თავდაცვის სამინისტროს დელეგაციისთვის საქართველოს შეიარაღებული ძალების II ქვეითი ბრიგადის 23-ე ბატალიონის ავღანეთში გადასროლისწინა მომზადების საჩვენებელი სწავლება გაიმართა.
„მინდა აღვნიშნო ქართული სამხედრო ძალების მზადყოფნის მაღალი ხარისხი, რომელიც მათ საჩვენებელი წვრთნების ფარგლებში აჩვენეს. ისინი ავღანეთში საერთაშორისო მისიის შესასრულებლად მაღალი პროფესიონალიზმით გამოირჩევიან. ამ მიმართულებით ბევრი დადებითი სიტყვა მოვისმინეთ. ჩვენ ბევრჯერ ვამბობთ კიდევაც, რომ გვეუფლება სიამაყის განცდა, როდესაც ასეთ მაღალ შეფასებებს ვისმენთ. მომავალში გავაგრძელებთ იმ მნიშვნელოვანი რეფორმების განხორციელებას, რათა ჩვენი ქვეყნის თავდაცვისუნარიანობა, სამხედრო მომზადების ხარისხი იყოს ისეთი სტანდარტებით უზრუნველყოფილი, რომელსაც ნატო ითხოვს“, – განაცხადა ლევან იზორიამ გერმანიაში ვიზიტის დასასრულს.
აშშ-ის გაერთიანებული მრავალეროვანი მზადყოფნის ცენტრში (JMRC) სასწავლო ვითარება ავღანეთში არსებულ გარემოსთან მაქსიმალურადაა მიახლოებული. შექმნილია იმიტირებული ავღანური ქალაქი, სადაც ქართველი სამხედროები ავღანეთის ადგილობრივ მოსახლეობასთან კომუნიკაციის დამყარებას და ავღანეთში ყოფნისას საჭირო სხვა უნარ-ჩვევებს სწავლობენ, ეგუებიან იმ გარემოს, სადაც სამშვიდობო მისიის შესრულება მოუწევთ. ამერიკელი ინსტრუქტორები ქართველ სამხედროებს ამბოხებულთა საწინააღმდეგო (COIN) ოპერაციების წარმოებას, საბრძოლო ველის მომზადებას, გაწმენდას, შენარჩუნებასა და უსაფრთხოების დაცვას ასწავლიან. ჰოჰენფელზში მომზადების დასრულების შემდეგ, 23-ე ბატალიონი ავღანეთში გაემგზავრება და „მტკიცე მხარდაჭერის“ მისიას ქაბულსა და ბაგრამის საავიაციო ბაზაზე აშშ-ის სარდლობის დაქვემდებარებაში შეასრულებს.