დაკავებულ დეკანოზ გიორგი მამალაძესთან მისი ადვოკატები იმყოფებიან. გიორგი ფანცულაია და მიხეილ რამიშვილი ე.წ. მატროსოვის ციხეში ცოტა ხნის წინ მივიდნენ. ადვოკატებმა კიდევ ერთხელ აღნიშნეს, რომ გიორგი მამალაძე დუმილს დაარღვევს და ამისთვის არ არის საჭირო პროკურატურის წერილობითი ნებართვა. თუმცა ადვოკატები საგამოძიებო უწყებას შესაბამისი წერილით მაინც მიმართავენ.
დაკავებულთან შესვლის სურვილი ჰქონდა ჭყონდიდელ მიტროპოლიტ პეტრეს, თუმცა მას ამის უფლება არ მისცეს. მეუფე პეტრემ ჟურნალისტებთან საუბარში კიდევ ერთხელ განაცხადა, რომ საპატრიარქოში ვითარებას ერთი ქალი, შორენა თეთრუაშვილი აკონტროლებს და საჭიროა, რომ ის ჩამოშორდეს პატრიარქს.
„მამა მიქაელ ბოტკოველმა არასწორი განცხადება გაავრცელა. იყო თხოვნა, რომ არ შეგვეშალა ხელი გამოძიებისთვის, თუმცა მამა გიორგის ნახვით არაფერი შავდება და აქამდე არ ყოფილა შემთხვევა, რომ მასთან შესვლაზე უარი ეთქვათ,“- განაცხადა მეუფე პეტრე.