საქართველოს კულტურისა და ძეგლთა დაცვის სამინისტროსა და განათლებისა და მეცნიერების სამინისტროს მხარდაჭერით, ეროვნული კინოცენტრის პროექტის „კინო სკოლაში“ ახალ სეზონი დაიწყო, – ამის შესახებ კულტურისა და ძეგლთა დაცვის სამინისტრო იტყობინება.
მათივე ცნობით, პროექტის ფარგლებში ხვალ, 12:00 საათზე ახმეტაში და 15:00 საათზე პანკისის ხეობაში გიორგი ოვაშვილის ფილმის „გაღმა ნაპირი“ ჩვენებები გაიმართება.
„კინოსპეციალისტებსა და სკოლის პედაგოგებს ცნობილი ქართველი რეჟისორი გიორგი ოვაშვილი შეუერთდა. ცნობილი ქართველი რეჟისორი მის არაერთი საერთაშორისო ჯილდოს მფლობელ ფილმს „გაღმა ნაპირი“ ახმეტასა და პანკისის ხეობაში კინოსკოლელებისთვის აჩვენებს. ჩვენების შემდეგ გაიმართება დისკუსია. კინოჩვენებები გაიმართება 12:00 საათზე, ახმეტაში, #1 საჯარო სკოლაში, ხოლო 15:00 საათზე, პანკისის ხეობაში, სოფელ დუისის კულტურის ცენტრში.
„კინო სკოლაში” კინოგანათლების პოპულარიზაციაზე ორიენტირებული პროექტია, რომელიც მიზნად ისახავს მოზარდებში კრიტიკული აზროვნებისა და შემოქმედებითი უნარების განვითარებას. პროექტი მეოთხე წელია მიმდინარეობს და ყოველ სეზონზე სიახლეს სთავაზობს კინოსკოლელებს. წელს, „კინო სკოლაში“ აქტიურად ითანამშრომლებს განათლებისა და მეცნიერების სამინისტროს „თავისუფალი გაკვეთილების“ პროგრამასთან, რომლის ფარგლებშიც, კინოჩვენებებსა და დისკუსიებს კინოსპეციალისტებთან ერთად სკოლის პედაგოგებიც ჩაატარებენ.
პროექტში „კინო სკოლაში“ ჩართული კინოსპეციალისტები კოორდინაციას გაუწევენ და დაეხმარებიან სკოლის პედაგოგებს აიმაღლონ კვალიფიკაცია, რათა პროექტის დასრულების შემდეგ სკოლებში გაჩნდეს კომპეტენტური კადრები, რომლებიც დამოუკიდებლად გააგრძელებენ საქმიანობას, ჩამოაყალიბებენ კინო-კლუბებს და იზრუნებენ მოზარდების კულტურულ განვითარებაზე.
პროექტი „კინო სკოლაში“ საქართველოს კულტურისა და ძეგლთა დაცვის და განათლებისა და მეცნიერების სამინისტროების მხარდაჭერით მიმდინარეობს. ამჟამად, პროექტში ჩართულია 217 სკოლა და საქართველოს ყველა რეგიონი, მათ შორის, საოკუპაციო ხაზთან მდებარე და მაღალმთიანი სოფლები“, – აღნიშნულია საქართველოს კულტურისა და ძეგლთა დაცვის სამინისტროს ინფორმაციაში.