შინაგან საქმეთა მინისტრის მოადგილე გაზეთ “ქრონიკა პლიუსის” მთავარ რედაქტორს ურჩევს პროკურატურას მიმართოს. საუბარია ელისო კილაძის მიერ დღეს გავრცელებულ ინფორმაციაზე, რომლის მიხედვითაც მისი შვილისთვის ნარკოტიკული ნივთიერების ჩადებაში, შსს-ს კრიმინალური პოლიციის ნარკოტიკების უკანონო ბრუნვის სამმართველოს უფროსი მონაწილეობდა.
შალვა ხუციშვილის განცხადებით, ელისო კილაძის მიერ გაჟღერებულ ბრალდებებზე გამოძიება უკვე მიმდინარეობს.
„რამაზ თარაშვილს არ ვიცნობ, მაგრამ ვიცი, გამიგია რომ ერთ-ერთი საკმაოდ გამოცდილი თანამშრომელია. ელისო კილაძეს რაც შეეხება, შემიძლია სრული ხაზგასმით აღვნიშნო, რომ ამ საკითხზე მიმდინარეობს გამოძიება. ჩემი მხრიდან რაიმე დამატებითი კომენტარის გაკეთება ზედმეტია, როდესაც მიმდინარეობს გამოძიება. არის პროკურატურა, ქალბატონ ელისოს შეუძლია მიმართოს,“ – განაცხადა შალვა ხუციშვილმა.