საგარეჯოში, ცხენების ქურდობის ბრალდებით დაკავებული არასრულწლოვნის ოჯახი ქურდობის ბრალდებას უსაფუძვლოს უწოდებს.
როგორც დაკავებულის დამ, ლია გიგაურმა განაცხადა, მის ძმას ხელფასი არ გადაუხადეს, ამიტომ ტრანსპორტის არქონის გამო ფერმა ცხენით დატოვა.
”ცხენი არ მოუპარავს. ბავშვს ხელფასი არ გადაუხადეს და რადგან ტრანსპორტი არ ჰქონდა, ცხენზე შეჯდა და წავიდა. უბრალოდ აბრალებენ, რომ ცხენი მოიპარა”, – განაცხადა გიგაურმა ტელეკომპანია ”იმედთან” საუბარში.
საგარეჯოში დაკარგული 15 წლის ბიჭი პოლიციამ ცხენების ქურდობის ბრალდებით დააკავა. როგორც ”ინტერპრესნიუსს” შსს-ში განუცხადეს, პოლიციამ თავისი ძალებით დაკარგული ბიჭი გუშინ ღამით იპოვა. დაკავებული მამის სახლში, სოფელ ზემო ქედში იპოვეს.
”ის დაკავებულია ქურდობის ბრალდებით სისხლის სამართლის კოდექსის 177-ე მუხლით (ქურდობა). პოლიციამ ფერმიდან მოპარული 2 ცხენი ნივთმტკიცებად ამოიღო. გამოძიება ფერმის მეპატრონის განცხადების საფუძველზე დაიწყო”, – აცხადებენ შსს-ში.
უწყების ინფორმაციით, არასრულწლოვნის დაკარგვის თაობაზე შეტყობინება ორი დღის წინ შევიდა.