25 წლის გიორგი ლომიძემ (სახელი და გვარი შეცვლილია) Facebook-ზე ფოტო გამოაქვეყნა, რომელზეც მას ცემის კვალი აღენიშნება. როგორც გიორგი „ლიბერალთან“ ამბობს, მას ჰომოფობიურ ნიადაგზე დაესხნენ თავს.
ამის შესახებ ინფორმაციას ინტერნეტპორტალი “ლიბერალი” ავრცელებს.
“ავლაბარში ვიყავი და ეკლესიის მიმდებარე ტერიტორიაზე ბირჟა იყო, რამდენიმე ტიპი იდგა და მე რომ დამინახეს დაიწყეს შეძახილები „პიდარასტების დედა მო****ნ“. მე ეს თავიდან არ შევიმჩნიე; მერე ერთი მათგანი მოვიდა, სიგარეტი ხომ არ გაქვსო და არა-მეთქი; მერე ჩემს ტატუზე გააკეთა აქცენტი რა გახატიაო, არაფერი-მეთქი და უხეშად ვუპასუხე, თავი დაენებებინა. მერე ხელი მტაცა ერთმა და გადამიყვანა შესახვევში; ხალხი იქაც მოძრაობდა; ერთხელ დამარტყა, მერე ამერია ყველაფერი, აზრზე ვერ მოვედი, რა ხდებოდა და გავიქეცი, ტაქსიში ჩავჯექი და წავედი მეგობართან“, – ამბობს გიორგი.
როგორც ის ამბობს, მომხდარის შესახებ პოლიციისთვის არ უცნობებია.
“პოლიციაში არ დამირეკავს, პირველად მოხდა ასეთი რაღაც ჩემს ცხოვრებაში და თან მარტო ვიყავი…“, – ამბობს გიორგი.
დღეს, 17 მაისს, ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეა.