ისან-სამგორის პოლიციის სამმართველოს მე-7 განყოფილების უფროსი თანამდებობიდან გაათავისუფლეს. როგორც “ინტერპრესნიუსს” შს სამინისტროში განუცხადეს, აღნიშნულის მიზეზი ინტერნეტში გავრცელებული ვიდეომასალაა, სადაც ასახულია, თუ როგორ ხდება მე-7 განყოფილებაში პირის ჩხრეკა, შემდეგ კი გარეშე პირების თანდასწრებით მისი გაშიშვლება.
“ლიბერალი” წყაროზე დაყრდნობით ავრცელებს ინფორმაციას, რომ პოლიციის მე-7 განყოფილების შიდა კამერების მიერ გადაღებულ ვიდეომასალაში ნარკოტიკული საშუალების მოხმარებისა და გავრცელებისთვის დაკავებულის, შოთა პაკელიანის დაკითხვის პროცედურაა ასახული. გამოცემის წყაროს განცხადებით, პაკელიანის ცემის ამსახველი კადრები არ არსებობს, ვინაიდან ოთახში, სადაც ის სცემეს, კამერები დამონტაჟებული არ ყოფილა. წყაროს ინფორმაციით, ვიდეოკადრებში ასევე ჩანს, როგორ ამოწმებენ პოლიციელები პაკელიანის ახლობლების კუთვნილ ტელეფონებს, შესაძლო კადრების წაშლის მიზნით.
ფიციალური ინფორმაციით¸მიმდინარე წლის 23 მარტს თბილისში, ისანი-სამგორის რაიონში, პოლიციელებმა, ოპერატიული ინფორმაციის საფუძველზე, გადამოწმების მიზნით შოთა პაკელიანი, რომელიც არ დაემორჩილა სამართალდამცველთა კანონიერ მოთხოვნას და მიმალვა სცადა, რა დროსაც წაიქცა და სხეულზე (სახის, ხელის და მუხლის არეში) მიიღო დაზიანებები. სამართალდამცავებმა ბრალდებულის პირადი ჩხრეკისას, 0,0664 გრამი ნარკოტიკული საშუალება – ე.წ. “ბიო” ამოიღეს.
ოფიციალურ ბრალდებას არ ეთანხმება ბრალდებულის ოჯახი.