თბილისში, გურამიშვილის გამზირზე, აღმოსავლეთ ევროპის უნივერსიტეტის შენობასთან დაჭრილი სპორტსმენის მდგომარეობა, რამდენიმესაათიანი ოპერაციის შემდეგ, სტაბილურია. ამის შესახებ ინფორმაციას 1tv.ge ავრცელებს.
დაჭრილ სპორტსმენს მეხუთე საავადმყოფოში რამდენიმესაათიანი ოპერაცია ჩაუტარდა.
ექიმების განცხადებით, კაცს სხეულის ზედა ნაწილში, მათ შორის ყელის არეში მრავლობითი ჭრილობები აღენიშნებოდა. პაციენტი რეანიმაციულ განყოფილებაში რჩება.
ახალგაზრდები აღმოსავლეთ ევროპის უნივერსიტეტიდან გამოდიოდნენ, როდესაც მათ თავს დაესხნენ და ცივი იარაღით ჭრილობები მიაყენეს. უნივერსიტეტში ძალისმიერ სამჭიდში მსოფლიო ჩემპიონატი ტარდებოდა.
შინაგან საქმეთა სამინისტროს ცნობით, მომხდარზე გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.