მამა კახაბერ გოგოტიშვილი აცხადებს, რომ დეკანოზ გიორგი მამალაძისთვის მღვდელმსახურების უფლების შეჩერება მეუფის “კაპრიზი” არ არის და ეს საეკლესიო კანონდებლობით გათვალისწინებული ქმედებაა.
ამის შესახებ “პრაიმტაიმს” მამა კახაბერმა განუცხადა და აღნიშნა, რომ საეკლესიო კანონის წესია – როდესაც მღვდლის საქმე განიხილება და ის არის ბრალდებული, სანამ არ დამტკიცდება მისი ბრალეულობა/ არა ბრალეულობის საკითხი, მას მღვდლობა უნდა შეუჩერდეს.
როგორც მამა კახაბერმა განმარტა, ეს კანონი იმიტომ მიიღეს, რომ ეკლესია უფრთხილდებოდა თავის პრესტიჟს.
“ადამიანი როცა ბრალდებულია, ვიღაცას შეიძლება სჯეროდეს მისი ბრალეულობა, ვიღაცას შეიძლება არ სჯეროდეს. რომ არ ეთქვათ: დამნაშავე მღვდელი მღვდლობას აგრძელებსო, ამიტომ მიიღეს ეს გადაწყვეტილება. ეკლესია უფრთხილდებოდა ადამიანებს და კანონად იქცა, რომ როცა საქმე გამოძიებაში, მას უნდა შეუჩერდეს მღვდელმსახურების უფლება. ეს მეუფის კაპრიზი არ გეგონოთ, ეს საეკლესიო კანონმდებლობა არის”,-განაცხადა კახაბერ გოგოტიშვილმა.
რაც შეეხება ზიარების ფულების შეჩერებას, მამა კახაბერმა აღნიშნა, რომ ეს პირადი საკითხია და ამაზე შესაძლოა მეუფემ ვერც ისაუბროს.
“შეიძლება ბოლომდე არ თქვას იმიტომ, რომ შეიძლება ეს გადაწყვეტილება აღსარებიდან გამომდინარე იყოს მიღებული. ეს მეუფის გადასაწყვეტი იყო”,- განაცხდა მამა კახაბერმა.