ვენეციის კომისიის პრეზიდენტი ჯანი ბუკიკიო საქართველოში ჩამოვიდა. მისი თვითმფრინავი ბათუმის საერთაშორისო აეროპორტში ცოტა ხნის წინ დაეშვა.
მასთან ერთად საქართველოში 40-ზე მეტი ქვეყნის 200-მდე სტუმარი ჩამოვიდა, რომელთა შორისაც არიან საკონსტიტუციო სასამართლოების თავმჯდომარეები და მოსამართლეები.
სტუმრები ევროპის საკონსტიტუციო სასამართლოების კონგრესში მიიღებენ მონაწილეობას, რომელიც საქართველოს საკონსტიტუციო სასამართლოს ორგანიზებით დღეიდან 1 ივლისის ჩათვლით, ბათუმში გაიმართება.
ბუკიკიოს ბათუმში 15 პოლიტიკური პარტია შეხვდება.
საკონსტიტუციო ცვლილებებთან დაკავშირებით ვენეციის კომისიის რეკომენდაციები 19 ივნისს გახდა ცნობილი. ევროპელმა ექსპერტებმა რჩევები 111-ე პლენარული სესიის ფარგლებში 16 ივნისს მიიღეს. საკონსტიტუციო ცვლილებების მიხედვით: პრეზიდენტს საარჩევნო კოლეგია ირჩევს, მაჟორიტარული სისტემა უქმდება, ოჯახის დეფინიცია განისაზღვრება, გენერალურ პროკურორს პარლამენტი ამტკიცებს, მოსამართლეების წარდგენა-დანიშვნაში პრეზიდენტის უფლებები იზღუდება, ევროპულ და ევროატლანტიკურ სტრუქტურებში ინტეგრაცია ჩაიწერება, პარლამენტის ადგილსამყოფელი განსაზღვრული არ არის.