სიღნაღის რაიონის სოფელ ნუკრიანში მე–19 საუკუნის წმინდა გიორგის სახელობის ეკლესია გაქურდეს. დილით ტაძარში მისულ მედავითნეს კარზე საკეტი ჯაჭვი გატეხილი დახვდა.
ობიექტივის ექსკლუზიური ინფორმაციით, დარბეულია საკურთხეველი, ძირს ეყარა ხატები, ბიბლია, სახარება და რელიგიური ლიტერატურა.
როგორც ტაძრის წინამძღოლი, დეკანოზი მირიან ხოხონიშვილი ამბობს, მოპარულია ძვირადღირებული ვერცხლის დიდი ჯვარი, რომელსაც მოძღვარი მსახურებისას იყენებდა, ფეშხუმი და სხვა საეკლესიო ნივთები.
შემთხვევის ადგილზე ექსპერტ–კრიმინალისტები მუშაობენ. გამოძიებას სიღნაღის რაიონული პოლიცია აწარმოებს. გამოძიებამ უკვე დაკითხა თვითმხილველები და ტაძრის მიმდებარედ მცხოვრები მოქალაქეები. ეჭვმიტანილის ვინაობა დადგენილი არ არის.
კომენტარები