მიმდინარე წვრთნები არის ერთ-ერთი მაგალითი ამერიკის დახმარებისა საქართველოს თავდაცვის უნარის განმტკიცებაში – ამის შესახებ აშშ-ის ვიცე პრეზიდენტმა მაიკ პენსმა დღევანდელ პრესკონფერენციაზე განაცხადა.
როგორც მან აღნიშნა, პრეზიდენტი ტრამპი და ის მხარს უჭერენ 2008 წლის ბუქარესტის სამიტის განცხადებას, რომ საქართველო გახდება ნატოს წევრი.
“ასევე ძალიან დიდი შთაბეჭდილების მომხდენია, რომ საქართველო მშპ-ის 2%-ს ხარჯავს თავდაცვის სფეროზე და ამით ნატოს ზოგიერთ წევრს ასწრებს, თუმცა ეს მძიმე რეალობით არის გამოწვეული. სულ რაღაც 40 კილომეტრის მანძილზე რუსული ტანკები გახლავთ განლაგებული საქართველოს ტერიტორიაზე. ტერიტორიის 20% არის ოკუპირებული და მე ხაზს ვუსვამ, რომ ამერიკის შეერთებული შტატები მკაცრად გმობს რუსეთის მიერ საქართველოს ტერიტორიის ოკუპაციას. აშშ მხარდაჭერას უცხადებს საქართველოს სუვერენიტეტს და ტერიტორიულ მთლიანობას”, – განაცხადა მაიკ პენსმა.
მისივე თქმით, დონალდ ტრამპის ადმინსიტრაცია ყოველთვის მკაცრს პასუხს გასცემს იმ ქვეყნებს, რომლებსაც პრეტენზია ექნებათ საქართველოს სუვერენიტეტი და ტერიტორიული მთლიანობა ხელყონ.
მან ასევე აღნიშნა, რომ პრეზიდენტმა ტრამპმა ხელი მოაწერა და მალე მას საკანონმდებლო სახე მიეცემა, სანქციებს, რომელიც რუსეთის წინააღმდეგ არის მიმართული.
“ჩვენ გვსურს რუსეთის წინააღმდეგ სანქციების გაუქმება, ჩვენ გვსურს რუსეთთან ურთიერთობები, მაგრამ ამის მიღწევა შეიძლება მხოლოდ მას შემდეგ, რაც რუსეთი გააუქმებს თავის დესტრუქციულ ქმედებებს”, – აღნიშნა ვიცე პრეზიდენტმა.