GEM Fest-ის ტერიტორიაზე უცნობი ნივთიერებით ზედოზირებას 22 წლის ნათია თავართქილაძის სიცოცხლე ემსხვერპლა. გარდაცვლილ გოგონასთან ერთად, ზუგდიდის რეფერალურ საავადმყოფოში ინტოქსიკაციის ნიშნებით კიდევ 7 ახალგაზრდა გადაიყვანეს. შვიდივე გადარჩა და მათი მდგომარეობა ამ დროისთვის სტაბილურია. რამ გამოიწვია ახალგაზრდების ინტოქსიკაცია, ამ დროისთვის უცნობია, თუმცა, არაოფიციალური ინფორმაციით, ამის მიზეზი სინთეზური (ქიმიური ნივთიერებების ნაკრები) ნარკოტიკის მოხმარება გახდა.
თავდაპირველად ვრცელდებოდა ინფორმაცია, რომ ეს ნივთიერება ბიო იყო, თუმცა მოგვიანებით „თეთრი ხმაურის“ მოძრაობამ თავის წყაროებზე დაყრდნობით დაწერა, რომ ახალგაზრდების ინტოქსიკაცია ნივთიერება GHB-მ გამოიწვია.
„ვრცელდება ინფორმაცია, რომ GEM Fest-ზე მყოფი რამდენიმე ადამიანის მძიმე ინტოქსიკაცია შესაძლოა, გამოწვეული იყოს ნივთიერება GHB-თ. მიუხედავად იმისა, რომ აღნიშნული ჯერ ოფიციალურად არ დადასტურებულა, მომატებული რისკების თავიდან აცილების მიზნით, ვავრცელებთ მცირე ინფორმაციას ამ ნივთიერების, მის მოხმარებასთან დაკავშირებული რისკებისა და აუცილებელი რეკომენდაციების შესახებ. GHB, იგივე [G, Georgia Home Boy, Juice], ტოქსიკური პრეპარატია ზედოზირების მაღალი რისკებით. ის ცნს-ის დამთრგუნველი მოქმედებით გამოირჩევა და დოზის მცირე ცვლილებაც კი მძიმე ზედოზირების რისკს ქმნის, რის დროსაც ითრგუნება სასუნთქი სისტემა, შესაძლოა, ადამიანი ჩავარდეს კომაში და/ან გარდაიცვალოს“, – ვკითხულობთ „თეთრი ხმაურის“ განცხადებაში.
ტრაგიკული მოვლენების პარალელურად „ჯემ ფესტის“ ორგანიზატორები ირწმუნებიან, რომ საფესტივალო ტერიტორიაზე ყველა ნარკოტიკული საშუალების რეალიზება აკრძალულია.
„GEM Fest-ის არსებობის დღიდან ჩვენს ოფიციალურ ვებგვერდსა და სხვა საკომუნიკაციო არხებზე აქტიურად ვეწევით კამპანიას ნარკოტიკული ნივთიერებების, განსაკუთრებით კი ბიოს მავნებლობის შესახებ. უფრთხილდით ბიოს, ის კლავს!
შესაბამის ორგანოებთან ერთად ჩვენ ვცდილობთ, ფესტივალის ტერიტორიაზე მაქსიმალურად დაცული იყოს ადამიანის ჯანმრთელობა და უსაფრთხოება, ამ მიზნით GEM Fest-ის სივრცეში ხდება თითოეული ვიზიტორის პასის სკანირება, რომელიც პერსონალურ ინფორმაციას შეიცავს და ასევე, სტუმართა სრული შემოწმება. შესაბამისი უწყებები უზრუნველყოფენ, რომ ტერიტორიაზე არ შემოვიდეს ნარკოტიკული ნივთიერება, განსაკუთრებით კი შხამი, სახელწოდებით ბიო! საფესტივალო სივრცეში 24/7-ზე ოპერირებს საერთაშორისო სტანდარტის შესაბამისი სამი მედპუნქტი, რომელიც მიმართვიანობის შემთხვევაში, ეფექტურად მუშაობს.
კიდევ ერთხელ ვაფიქსირებთ ჩვენს პოზიციას, რომ ბიო არის შხამი და ის კლავს!“, – ვკითხულობთ ორგანიზატორების განცხადებაში.
შსს-მ კი ფესტივალის ტერიტორიაზე უკვე დააკავა 5 პირი ნარკოდანაშაულის ბრალდებით, მათ შორის მედიის ინფორმაციით, ერთ-ერთი „თეთრი ხმაურის მოძრაობის“ წევრია. ამ ინფორმაციას „პრაიმტაიმთან“ საუბრისას უარყოფს „თეთრი ხმაური“.
დათო სუბელიანი, „თეთრი ხმაური: „პირი, რომელიც დააკავეს, ჩვენი მოძრაობის მხარდამჭერია, ისევე, როგორც ათასობით ახალგაზრდა. „თეთრი ხმაურის“ მოძრაობის ოფიციალური წევრი არ არის. არც კი ვიცნობ, არასდროს შევხვედრივარ. ამიტომ ამ ფაქტთან დაკავშირებით კომენტარს ვერ გავაკეთებ“.
ვის ეკისრება პასუხისმგებლობა? ამ კითხვაზე პასუხს, სავარაუდოდ, გამოძიება დაადგენს, თუმცა მანამდე პროცესი ურთიერთბრალდებების ფონზე მიმდინარეობს. „თეთრი ხმაურის“ მოძრაობა ვარაუდობს, რომ ფესტივალის ტერიტორიაზე ნარკოტიკის რეალიზაციაში ფესტივალის ორგანიზატორები არიან ჩართულები.
დათო სუბელიანი, მოძრაობა „თეთრი ხმაური“: „ფესტივალზე განვითარებული „დრაგსცენა“ ფორმალურად არა, მაგრამ რეალურად სახელმწიფოსთან იყო შეთანხმებული. ფესტივალის მიმდინარეობის განმავლობაში ჩვენი ნაცნობები, მეგობრები გვწერდნენ და გვეუბნებოდნენ, რომ პოლიცია მკაცრად აკონტროლებს და გარედან ძალიან ძნელია ნარკოტიკის შეტანა, ამიტომ ჩვენ მოგვიწია, დაგვეტოვებინა ნარკოტიკები გარეთ. თავიდან ეშინოდათ, რომ ნარკოტიკების გარეშე დარჩებოდნენ. მოგვიანებით აღმოჩნდა, რომ ნარკოტიკების გარეშე დარჩენის პრობლემა საერთოდ არ არის. ნარკოტიკები იქ ბევრია. ადმინისტრაცია ამბობს, ყველაფერს ვასკანერებთ და ჩიტი ვერ შეფრინდებაო. ჩვენ ვიცოდით, რომ იქ მოუწიათ იმის ყიდვა, რაც იყო ხელმისაწვდომი. როდესაც ძალიან უჭერ, ნარკოტიკების მომხმარებელს არჩევანის საშუალება არ რჩება და არის რისკი, რომ მიიღებს ისეთ ნარკოტიკს, რომელიც მომაკვდინებელია.
– თქვენ ამბობთ, რომ ნარკოტიკების რეალიზებაში ადმინისტრაციაა ჩართული?
– მტკიცებით ფორმაში არ მინდა ვისაუბრო, მაგრამ ფაქტია, რომ გარედან შეტანა უჭირდათ, სამაგიეროდ შიგნით ნარკოტიკის პრობლემა არ იყო. ადამიანს მოუწევდათ იმის ჭამა და დალევა, რაც იქ იყიდებოდა. ეს არის სახელმწიფო პროექტი“.
„პრაიმტაიმი“ „თეთრი ხმაურის“ ბრალდებებზე პასუხის მოპოვებას „ჯემ ფესტის“ ორგანიზატორისგან, გიორგი სიგუასგან შეეცადა. მან დროის უქონლობისა და მნიშვნელოვანი საერთაშორისო სტუმრების გამო პოზიციის დაფიქსირება ვერ მოახერხა. თუმცა მანამდე ამ საკითხთან დაკავშირებით ჟურნალისტებთან კომენტარი გააკეთა და ჩვენ ამ განცხადებას გთავაზობთ: “GEM FEST -ის ტერიტორიაზე ყველა სახის ნარკოტიკული ნივთიერების შეძენა იკრძალება. ტყუილია ინფორმაცია, რომ თითქოს აქ რეალიზება ხდება”, – ამბობს გიორგი სიგუა.
შემთხვევის ადგილზე ჩავიდა შს მინისტრი, თუმცა ტერიტორია მედიასთან კომენტარის გარეშე დატოვა.
„პრაიმტაიმის“ ინფორმაციით, გარდაცვლილი ნათია თავართქილაძე ნარკოტიკების მომხმარებელი არ იყო. ნივთიერების მიღების შემდეგ უგონო მდგომარეობაში, უყურადღებოდ გარკვეული დროის მანძილზე იმყოფებოდა. როგორც გვითხრეს, მისთვის დახმარება რომ დროულად აღმოეჩინათ, გოგონა დღეს ცოცხალი იქნებოდა. ის ფესტივალზე მეგობრებთან ერთად იმყოფებოდა.
22 წლის გოგონას სიკვდილი ლაკმუსის ქაღალდი აღმოჩნდა. გამოიკვეთა, რომ ნარკოტიკული ნივთიერებების შემადგენლობის არცოდნის პრობლემასთან ერთად, საზოგადოების ინფორმირებულობის პრობლემაც მწვავედ დგას.
მოძრაობა „თეთრი ხმაურის“ ერთ-ერთი ლიდერის ბექა წიქარიშვილის თქმით, ახალგაზრდებს რომ ნივთიერებების შესახებ ინფორმაციები ჰქონდეთ ან საქართველოში შემოსული ნარკოტიკული საშუალებების შემადგენლობის კვლევა ხორციელდებოდეს, ზედოზირებისა და ლეტალობის შემთხვევები დაიკლებდა.
„საერთაშორისო სტატისტიკით ზედოზირების შედეგად დამდგარი ლეტალობის შემთხვევებით საქართველო მსოფლიოში მეხუთე ადგილზეა. საქართველოში კი ზედოზირების შედეგად გარდაცვლილი ადამიანების ზუსტი სტატისტიკა არ მოიპოვება“, – ამბობს ბექა წიქარიშვილი.
22 წლის გოგონას გარდაცვალება კვლავ გახდა მიზეზი ლიბერალური ნარკოპოლიტიკისა და მისი მოწინააღმდეგეების დაპირისპირების. საზოგადოების ნაწილი „ჯემ ფესტზე“ მომხდარი ინციდენტის მიზეზად ხელისუფლების ლოიალურ ნარკოპოლიტიკას ასახელებს, ნაწილი კი – იმავე ხელისუფლების რეპრესიულ პოლიტიკას.
მკაცრსა და არასწორ ნარკოპოლიტიკაზე კიდევ ერთხელ ახმაურდა მოძრაობა „თეთრი ხმაური“ და გოგონას გარდაცვალება სახელმწიფო პოლიტიკის შედეგად მოიხსენია.
„GHB-ს თხევად ექსტაზს უწოდებენ, თუმცა ამას „ექსტაზთან“ კავშირი არ აქვს. ქართველი მომხმარებელი, რომელიც GHB-ს საერთოდ არ იცნობს, და იცის „ექსტაზი“, ფიქრობს, რომ მიჩვეულები არიან და მიიღებენ. სინამდვილეში სულ სხვა ნარკოტიკს იღებენ და ასეთი რაღაცები რეპრესიული ნარკოპოლიტიკის ვითარებაში ხდება. ამ პოლიტიკის შედეგია გარდაცვლილი გოგონა და მოცდის დრო არ არის“, – აცხადებს დათო სუბელიანი.
საზოგადოების ნაწილი „ჯემ ფესტის“ წინააღმდეგ წავიდა და ისევ გააქტიურდა განცხადებები, რომელიც ამ ფესტივალის პირველად ჩატარებას ახლდა: „ნარკოტიკებისა და გარყვნილების ბუნაგი“, „ღუპავენ ჩვენს ახალგაზრდებს“ და ა.შ.
„თეთრი ხმაური“ და პოლიტიკური გაერთიანება „გირჩი“ ამ შემთხვევის გამო სოციალურ ქსელებში მკაცრად გააკრიტიკეს. ორივე პლატფორმა ლიბერალური ნარკოპოლიტიკის მომხრეა და მიაჩნია, რომ კონტროლის შესუსტება და სწორი მიდგომები უზრუნველყოფს იმას, რომ ქართულ ბაზარზე უხარისხო ნარკოტიკი აღარ შემოვა და აღარც ახალგაზრდები ჩაატარებენ ექსპერიმენტებს საკუთარ თავზე.
„პრაიმტაიმი“ „გირჩის“ ლიდერთან ზურა ჯაფარიძესთან დაკავშირებას შეეცადა, რადგან ის აქტიურად უჭერს მხარს ნარკოტიკების ლეგალიზების პროცესს, თუმცა ობიექტური მიზეზების გამო მასთან საუბარი ვერ შევძელით. იმედი გვაქვს, რომ მიმდინარე კვირაში ამ საკითხთან დაკავშირებით მის პოზიციას მოვისმენთ.
„პრაიმტაიმმა“ საქართველოს პარლამენტის ჯანდაცვის კომიტეტის თავმჯდომარესთან აკაკი ზოიძესთან და თავმჯდომარესთან დიმიტრი ხუნდაძესთანაც სცადა დაკავშირება, თუმცა მათ ჩვენს ზარებს არ უპასუხებს.
შსს-მ საქმე 115-ე მუხლით დაიწყო, რაც თვითმკვლელობამდე მიყვანას გულისხმობს.
P.S. GEM Fest-ის სცენაზე გამოსული საერთაშორისო დონის შემსრულებლები აღარავის ემახსოვრება, თუმცა ვერავინ დაივიწყებს 22 წლის ნათია თავართქილაძეს, რომელიც ფესტივალზე ნარკოტიკის ზედოზირებას ემსხვერპლა.
www.primetime.ge