ოდესის ოლქის ყოფილი გუბერნატორის განცხადებით, ბოლო გამოკითხვებით ის ყველაზე პოპულარული და სანდო პოლიტიკოსია უკრაინაში. ამის შესახებ მიხეილ სააკაშვილმა “ამერიკის ხმისთვის” მიცემულ ინტერვიუში განაცხადა.
მისი თქმით, უკრაინელი ხალხის წინაშე ვალდებულება აქვს აღებული, რომელიც უნდა შეასრულოს. მიხეილ სააკაშვილი ჩუმად ყოფნას არ აპირებს და ამბობს, რომ ბრძოლას გააგრძელებს.
ჟურნალისტი დაინტერესდა, რამდენად სწორად შეავსო მან ის განაცხადი, რომელიც უკრაინის მოქალაქეობის მისაღებად იყო აუცილებელი და ჩაწერა თუ არა, რომ საქართველოს ხელისუფლებას მასზე სისხლისსამართლებრივი დევნა ჰქონდა გამოცხადებული, რაზეც სააკაშვილმა მიუგო, რომ ყველაფერი სწორად ჩაწერა, თუმცა საუბრის გადატანა სხვა თემაზე სცადა და განაცხადა, რომ მსოფლიოში არავინ აღიარებს მის მიმართ წაყენებულ ბრალდებებს.
მიხეილ სააკაშვილმა უკრაინის პრეზიდენტი ყალბ დოკუმენტზე ხელის მოწერაში აქეთ დაადანაშაულა და თქვა, რომ პეტრო პოროშენკომ დანაშაული ჩაიდინა. საქართველოს ყოფილი პრეზიდენტი, ერთ დროს ყველაზე სანდო პარტნიორსა და მეგობარ პოროშენკოს დღეს ლაჩარს უწოდებს, რადგან მას მოქალაქეობა უკანონოდ შეუჩერა. მისივე განმარტებით, ამის უფლება უკრაინის პრეზიდენტს სამართლებრივად არ აქვს.