საქართველოს ყოფილ პრეზიდენტს, ოდესის ოლქის ექსგუბერნატორს უკრაინის ტერიტორიაზე შესვლა მხოლოდ ვიზის საფუძველზე შეეძლება. ამის შესახებ უკრაინის გენპროკურორის მოადგილე ევგენი ენინმა განაცხადა.
“სააკაშვილს უკრაინაში შესვლა შეეძლება მხოლოდ ვიზის გაფორმების შემდეგ”, – დაწერა ენინმა „ფეისბუკზე“.
მისი თქმით, “უკრაინის მოქალაქეობის ჩამორთმევის საკითხი სააკაშვილს შეუძლია, უმაღლეს ადმინისტრაციულ სასამართლოში გაასაჩივროს”.
უკრაინის პრეზიდენტმა 2015 წლის 30 მაისს საქართველოს ყოფილ პრეზიდენტს მიხეილ სააკაშვილს უკრაინის მოქალაქეობა მიანიჭა და იმავე დღეს ოდესის ოლქის გუბერნატორად დანიშნა. 2016 წელს სააკაშვილი დაკავებული თანამდებობიდან გადადგა და უკრაინის ხელისუფლება კორუფციის მხარდაჭერასა და კრიმინალების მფარველობაში დაადანაშაულა. მოგვიანებით, სააკაშვილმა თავისი პოლიტიკური ძალა ჩამოაყალიბა და უკრაინის რადას ვადამდელი არჩევნების ჩატარებისთვის ბრძოლა დაიწყო.
27 ივლისს უკრაინის პრეზიდენტმა პეტრო პოროშენკომ ოდესის ოლქის ყოფილი გუბერნატორისთვის, მიხეილ სააკაშვილისთვის მოქალაქეობის ჩამორთმევის განკარგულებას მოაწერა ხელი.