ორი მოსმენით მოსესაც კი არ მიუღია ათი მცნება, რითაც ვცხოვრობთ დღემდე, – ამის შესახებ საქართველოს პრეზიდენტმა გიორგი მარგველაშვილმა უფროსკლასელებსა და სტუდენტებთან გამართულ შეხვედრაზე განაცხადა, სადაც საუბრის ძირითადი თემა კონსტიტუციის მნიშვნელობას და მის შექმნაში საზოგადოების აქტიურ ჩართულობას ეხებოდა.
პრეზიდენტისთვის მიუღებელია, რომ ახალი კონსტიტუციის მიღებაში საზოგადოების ფართო ჩართულობა არ იყო და რომ ჩაკეტილ კარს მიღმა უსწრაფესად მოხდა მთავარი დოკუმენტის მიღება ისე, რომ არ მოხდა საზოგადოების ფართო მასების აზრის გათვალისწინება. მარგველაშვილი ასეთ რამეს დაუშვებლად მიიჩნევს, რადგან „კონსტიტუცია ეხება თითოეულ მოქალაქეს“.
„არ ვეთანხმები პროცესს, ეს კონსტიტუცია თითოეული ჩვენგანისაა და ის ფორმა, რაც ამ პროცესმა მიიღო, მიუღებელია. ჯერ ჩაკეტილ კარს მიღმა მუშაობა, მერე რა, რომ ამ ჩაკეტილ კარს მიღმა ჭკვიანი იურისტები და კონსტიტუციონალისტები მუშაობდნენ. კონსტიტუცია ხომ თითოეული მოქალაქისაა. ღმერთმა მე მომცა თავისუფლება და არა ვიღაც კონსტიტუციონალისტს. შესაბამისად, ის ჩემს თავისუფლებაზე რომ ლაპარაკობს და მთავარ დოკუმენტს წერს, მეც უნდა ჩამრთოს ამ პროცესში. მერე უცებ მოხდა ამ კონსტიტუციის გამოტანა და ორი მოსმენით უსწრაფესად მიღება. ორი მოსმენით მგონი, მოსესაც კი არ მიუღია ათი მცნება, რომლითაც დღეს ვცხოვრობთ”, – აღნიშნა გიორგი მარგველაშვილმა.
პრეზიდენტის განცხადებით, ბოლო დროს კონსტიტუციასთან დაკავშირებით განვითარებული მოვლენები პოკერის თამაშს ჰგავს, რადგან პოლიტიკოსები ერთმანეთს რაღაცებს უცხადებენ, ხოლო საზოგადოება ამ პროცესში კვლავ არ არის ჩართული.
“ამ ბოლო დროს ეს პროცესი პოკერის თამაშივით არის. ერთმანეთს უცხადებენ რაღაცებს. ეს ყველაფერი კი ისე მიდის, რომ საზოგადოება კვლავ არაა ჩართული. ახალი გამოცხადებაა ბუნებრივი ბარიერი თუ რაღაც ასეთი. საჭიროა ღია, ჩართული პროცესი. ეს პროცესი კი ყველაზე მეტად არ მომწონს. ასევე, არ მომწონს ბონუსის სისტემა”, – განაცხადა მარგველაშვილმა.