NASA-ს ვიზიტი კახეთში: – 28 სექტემბერს ოპერის თეატრში კოსმოსური ჩაკრულოს 40 წლის იუბილე აღინიშნება

“40 წლის წინ NASA-მ კოსმოსში გაუშვა ვოიაჯერის ორი აპარატი. უმნიშვნელოვანესი სამეცნიერო სამუშაოების გარდა, ამ აპარატების მისიაში შედის მზის სისტემიდან გასვლა და სხვა ვარსკვლავებისკენ ორო ოქროს დისკის გატანა. დისკებზე ჩაწერილია ინფორმაცია ადამიანთა მოდგმაზე, კაცობრიობის მდებარეობაზე, თავისებურებასა და კულტურაზე… და ამავე დისკზე, კაცობრიობის შედევრის სახით ჩაწერილია ქართული “ჩაკრულო”.

40 წლის შემდეგ, 25 სექტემბერს დისკზე ჩაწერილი “ჩაკრულოს” ერთ-ერთი შემსრულებლის, როსტომ საგინაშვილის მოსანახულებლად ამერიკიდან NASA-ს დელეგაცია ჩამოდის. (დელეგაციაშია რობ მენინგი _ ნასას მარსის პროგრამის მთავარი ინჟინერი და მოქმედი მარსმავალის პილოტი, რომლის ლექციასაც საქართველოში ბევრი სტუდენტი ელის) ბატონ როსტომს დელეგაცია კახეთის სოფელ კოლაგში ჩააკითხავს. რა საინტერესოა, ფუსფუსებდე შენს ვენახში, ღიღინებდე ჩაკრულოს და თან იცოდე რომ სადღაც, 13 მილიარდი კილომეტრის დაშორებით უცნობი სამყაროებისკენ მიფრინავს შენი შესრულებული სიმღერა..ქართული სიმღერა და არა რუსული “Подмосковные Вечера”, რომლის გაშვებასაც ითხოვდა მაშინდელი საბჭოთა კრემლი. ამერიკელებმა ქართული არჩიეს.
ეს ისტორია არც მე მეცოდინებოდა, რომ არა ჩემი მეგობარი რამაზ ბლუაშვილი, რეჟისორი და ენთუზიასტი, რომლის მონდომებამ გახადა შესაძლებელი საქართველოში NASA-ს ვარსკვლავების ჩამოყვანა და კოსმოსური ჩაკრულოს 40 წლის იუბილეს აღნიშვნის ორგანიზება. ამ პლანეტაზე ქართველები ბევრნი არ ვართ, ისტორიაში პატარა გამარჯვებები და მიღწევები გვახარებს, თუმცა არ ვუფრთხილდებით ამ მიღწევების შენარჩუნებას და პოპულარიზაციას. რამაზმა მთელი ერის საქმე გააკეთა.