საპარლამენტო უმრავლესობის ლიდერი არჩილ თალაკვაძე ამბობს, რომ საქართველოს პრეზიდენტმა არ გამოიყენა შესაძლებლობა, რომ პოზიტიური როლი შეეტანა საკონსტიტუციო რეფორმაში.
მისი თქმით, ახალ კონსტიტუციას უკვე აქვს მაღალი ლეგიტიმაცია, ვინაიდან მას აქვს საზოგადოების, ხუთი პოლიტიკური პარტიის მხარდაჭერა და ვენეციის კომისიის დადებითი დასკვნა.
„დღეს კონსტიტუცია დაუბრუნდება ხალხს და ეს იქნება კონსტიტუცია, რომელიც თითოეულ ადამიანს ყოველდღიურ ცხოვრებაში გამოადგება. ამ კონსტიტუციას უკვე აქვს მაღალი ლეგიტიმაცია, ვინაიდან მას მხარი დაუჭირა პარლამენტში ხუთმა პოლიტიკურმა პარტიამ და პოლიტიკურმა სუბიექტმა. ასევე, ამ კონსტიტუციას აქვს საზოგადოების მხარდაჭერა და ვენეციის კომისიის დადებითი დასკვნა, სადაც პირდაპირ არის ჩანაწერი, რომ კონსტიტუცია არის პროგრესული და ემსახურება ქვეყანის დემოკრატიულ განვითარებას. დღეს პრაქტიკულად ვასრულებთ საკონსტიტუციო რეფორმაზე მუშაობას. უკვე შეიძლება ითქვას, რომ საქართველოს ექნება ისეთი კონსტიტუცია, რომელიც არ იქნება რომლიმე პოლიტიკური პარტიის, რომელიმე ხელისუფლების ინტერესებზე მორგებული“,– განაცხადა თალაკვაძემ.