“ეს 24-წლიანი ჭრილობა დღეს, მართლაც დაიხურა. ბედნიერი ვარ, რომ მამაჩემი სხვებთან ერთად დაუბრუნდა თბილისს. ისინი ხალხის, ქვეყნის მიმართ სიყვარულის გამო დარჩნენ სოხუმში, – ამის შესახებ ჟურნალისტებს თავდაცვის ყოფილმა მინისტრმა ირაკლი ალასანიამ განუცხადა.
სამების საკათედრო ტაძარში აფხაზეთის ომში სამშობლოსთვის დაღუპული 25 გმირის სამოქალაქო პანაშვიდი გაიმართა. დაღუპულთა შორის არის ირაკლი ალასანიას მამა, მინისტრთა საბჭო/სახელმწიფო საინფორმაციო-სადაზვერვო სამსახურის რეგიონული კურატორი მამია ალასანია.
ირაკლი ალასანიამ მადალობა გადაუხადა ყველა იმ პირს, ვინც 25 ქართველის ცხედარის აფხაზეთიდან თბილისში გადმოსვენების ღონისძიებებში წვლილი შეიტანა.
“ეს 24-წლიანი ჭრილობა დღეს, მართლაც დაიხურა. აქ ყველა გმირია. არიან ავღანელი ვეტერანები, რომლებმაც დაიცვეს სოხუმი და შენობა, აქ არიან მთავრობის წევრები, ვინც არ დატოვეს სოხუმი და იყვნენ ბოლომდე სოხუმის მცველებად. მე ბედნიერი ვარ, რომ მამაჩემი სხვებთან ერთად დაუბრუნდა თბილისს. ისინი ხალხის, ქვეყნის მიმართ სიყვარულის გამო დარჩნენ სოხუმში. დიდი მადლობა მინდა გადავუხადო წითელ ჯვარს, მათ, ვინც უდიდესი და ურთულესი საქმე გააკეთა. ასევე სასულიერო, საერო ხელისუფლებას, საზოგადოებას, ვინც გულთან ახლოს მიიტანა და დააფასა მათი გმირობა. მე მგონია, რომ სწორედ, ასეთი ადამიანების მაგალითზე უნდა იზრდებოდნენ მომავალი თაობები”, – განაცხადა ირაკლი ალასანიამ.
საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ინფორმაციით, ხვალ სამოქალაქო პანაშვიდი 11:00 საათიდან გაიმართება. ხვალვე, 15:00 საათზე, აფხაზეთიდან გადმოსვენებულ გმირებს დიღმის ძმათა სასაფლაოზე სამხედრო პატივით დაკრძალავენ.
ირაკლი ალასანია: ეს 24-წლიანი ჭრილობა დღეს დაიხურა
2017/10/16 22:04:16
კომენტარები
ნანახია: 1275 ჯერ