მამუკა არეშიძის განცხადებით, ძალოვანი სტრუქტურების ეფექტურმა მუშაობამ ეთნიკური უმცირესობებით დასახლებულ რეგიონებში მოსალოდნელი საფრთხეები გაანეიტრალა.
აღნიშნული განცხადება მამუკა არეშიძემ „პირველის“ ოფისიდან პირდაპირ ეთერში ჩართვისას პოლიტოლოგ ვაჟა ბერიძის განცხადების საპასუხოდ გააკეთა.
ვაჟა ბერიძის განცხადებით, წინა ხელისუფლებები ეთნიკური უმცირესობებით დასახლებულ რეგიონებში არჩევნებს აზერბაიჯანის და სომხეთის ხელისუფლებებთან შეთანხმებით იგებდა, რადგან სწორედ მეზობელი ქვეყნების ხელისუფლების მიერ განხორციელებული ზარებით წყდებოდა იქ მცხოვრები ამოსახლეობა, რომელ კანდიდატს მისცემდნენ ხმას.
არეშიძის ცნობით, ამ არჩევნების წინ არაეთნიკურად ქართველებით დასახლებულ რეგიონებში ზარები, არა მხოლოდ სომხეთიდან და აზერბაიჯანიდან შედიოდა, არამედ თურქეთიდან, თეირანიდან და რამდენიმე არაბული ქვეყნიდანაც კი.
„განსაკუთრებით კახეთის ზოგიერთ სოფელში, სადაც ეთნიკურად არა ქართველი საქართველოს მოქალაქეები ცხოვრობდნენ, წინასაარჩევნოდ საგანგებო მდგომარეობა იყო. არჩევნებამდე რამდენიმე დღით ადრე ძალოვანმა სტრუქტურებმა ძალიან ეფექტურად იმუშავეს, საფრთხე გაანეიტრალეს. შესაბამისმა სტრუქტურებმა სხვა სახელმწიფოებიდან შემოსული საფრთხის შემცველი ზარები დაბლოკეს“, – განაცხადა სააგენტო „პირwელის“ ოფისში მამუკა არეშიძემ.