მსოფლიო ბანკის დაფინანსებით, გელათის სამონასტრო კომპლექსში რეაბილიტაციის მეორე ეტაპის განხორციელებისთვის მილიონნახევარ ლარამდე უნდა დაიხარჯოს. რეაბილიტაციის ფარგლებში, გელათის ღვთისმშობლის ტაძრის ეკვდერების გადახურვის, ცოკოლის და სადრენაჟო სისტემის რეაბილიტაციის სამუშაოები უნდა განხორციელდეს. სამუშაოების შესასრულებლად, საქართველოს მუნიციპალური განვითარების ფონდმა, მიმდინარე წლის 14 დეკემბერს, 1 349 075 ლარის ღირებულების ტენდერი(DEP170000080) გამოაცხადა. სატენდერო დოკუმენტაციის მიხედვით, გელათის სამონასტრო კომპლექსში ტაძრის ეკვდერების კარნიზების რეაბილიტაცია, ეკვდერების მოჭიქული კრამიტით გადახურვა, გამოვლენილი ისტორიული ლორფინის აღდგენა, აღმოსავლეთ, დასავლეთ და სამხრეთ ცოკოლის რეაბილიტაცია, ტაძრის სადრენაჟო სისტემის რეაბილიტაცია უნდა განხორციელდეს.
იუნესკოს მსოფლიო მემკვიდრეობის ძეგლთა ნუსხაში მყოფი ქართული კულტურული მემკვიდრეობის უმნიშვნელოვანესი ნიმუში – გელათის სამონასტრო კომპლექსი (XII-XVIII სს) დღეისათვის ერთ-ერთი ყველაზე ავთენტური სახით შემორჩენილი კომპლექსური ძეგლია საქართველოში. საუკუნეების მანძილზე, ბუნებრივი მოვლენებისა თუ საბრძოლო მოქმედებების გამო, სამონასტრო კომპლექსი მნიშვნელოვნად დაზიანდა. სხვადასხვა პერიოდში ჩატარებული ფრაგმენტული აღდგენითი სამუშაოები კვლავ მოითხოვს განახლებას და კომპლექსის სრულმასშტაბიან კონსერვაცია-რეაბილიტაციას.
გელათის სამონასტრო კომპლექსის რეაბილიტაციისთვის მილიონნახევარ ლარამდე დაიხარჯება
2017/12/17 11:51:23
კომენტარები
ნანახია: 1110 ჯერ