გიორგი ჭანტურიას ბინიდან კონკრეტული ნივთები იქნა ამოღებული, მაგრამ გამოძიების ინტერესებიდან გამომდინარე ვერ გეტყვით, რა ნივთებია, – ამის შესახებ ჟურნალისტებს თბილისში, გიორგი ჭანტურიას ბინის განმეორებითი ჩხრეკის დასრულების შემდეგ დეტექტივ-გამომძიებელმა ნუკრი მატუამ განუცხადა.
“გიორგი ჭანტურიას ბინაში სასამართლო განჩინების საფუძველზე ჩატარდა ჩხრეკა. კონკრეტული ნივთები იქნა ამოღებული. გამოძიების ინტერესებიდან გამომდინარე, ვერ მოგახსენებთ რა იქნა ამოღებული”, – განაცხადა დეტექტივ-გამომძიებელმა.
კითხვაზე, თუ რატომ არ იქნა ეს ნივთები ამოღებული პირველი ჩხრეკისას, დეტექტივმა განაცხადა, რომ პირველი ჩხრეკის დროს ამ ნივთების შესახებ ინფორმაცია არ ჰქონდათ.
“პირველი ჩხრეკის დროს აღნიშნულ ნივთებთან დაკავშირებით არ გვქონდა ინფორმაცია. გამოძიების მიმდინარეობისას ახლა გახდა ჩვენთვის ცნობილი კონკრეტული ნივთების შესახებ და იქნა ამოღებული”, – განაცხადა დეტექტივ- გამომძიებელმა.
როგორც ცნობილია, თბილისის გარდა განმეორებითი ჩხრეკა მიმდინარეობს ასევე გიორგი ჭანტურიას საცხოვრებელ სახლში რუსთავში.
გენერალ სამსონ (სოსო) ქუთათელაძის მკვლელობის გამოძიების ფარგლებში გიორგი ჭანტურია 16 იანვარს დააკავეს. იგი თითქმის 40 საათის განმავლობაში იყო დაკავებული, რის შემდეგაც ქვემო ქართლის პოლიციის დეპარტამენტის შენობა დატოვა. როგორც „ინტერპრესნიუსს“ შს სამინისტროში განუცხადეს, გიორგი ჭანტურიას მიმდინარე გამოძიებაზე ბრალი არ წარედგინა.