„თბილისის მერიამ მიმართა საერთაშორისო საფინანსო ორგანიზაციებსა და ადგილობრივ ექსპერტებს, რათა მოხდეს მათი მაქსიმალური ჩართულობა „სითი ინსტიტუტის“ მიერ შემოთავაზებული დოკუმენტაციის შეფასების პროცესში“,– ამის შესახებ თბილისის მერმა კახა კალაძემ, დღეს თბილისის გენგეგმის შესახებ გამართულ ბრიფინგზე განაცხადა.
კალაძემ გენგეგმის მნიშვნელობაზე ისაუბრა და აღნიშნა, რომ ეს დოკუმენტი თბილისის გრძელვადიან და სწორ განვითარებაზეა ორიენტირებული.
„მოგეხსენებათ დოკუმენტის სრულყოფისთვის კომპანია სითი ინსტუტმა მოითხოვა 45 დღიანი ვადა, რაზეც თბილისის მერიამ თანხმობა განაცხადა, რადგან ჩვენთვისაც მნიშვნელოვანია ამ დოკუმენტის არსებობა და მიღება. ჩვენ ვაცნობიერებთ საზოგადოების მაღალ ინტერესს ამ დოკუმენტის მიმართ და გაცნობებთ, რომ თბილისის მერიამ მიმართა საერთაშორისო საფინანსო ორგანიზაციებსა და ადგილობრივ ექსპერტებს, რათა მოხდეს მათი მაქსიმალური ჩართულობა სითი ინსტიტუტის მიერ შემოთავაზებული დოკუმენტაციის შეფასების პროცესში. აქტიური კონსულტაციების შედეგად მოხდა შეთანხმება თბილისის მერიასა და საერთაშორსო საფინანსო ორგანიზაციებს შორის. შესაბამისად მსოფლიო ბანკმა ევროპის რეკონსტრუქციისა და განვითარების ბანკმა, აზიის განვითარების ბანკმა და საერთაშორისო კომპანია „ბიურო ჰაპოლდმა“, რომელიც არის მერიის სტრატეგიული პარტნიორი ქალაქის განვითარების პროცესში გამოთქვეს მზადყოფნა მათ მიერ შერჩეული ექსპერტები ჩართონ გენგეგმის საბოლოო ვარიანტის შეფასების პროცესში. ჩვენ ასევე დავუკავშირდით ადგილობრივ ექსპერტებს და მათი ჩართულობაც იქნება უზრუნველყოფილი, რა თქმა უნდა მერიის შესაბამისი სამსახურებიც მზად არიან თანამშრომლობისთვის და დოკუმენტის შეფასებაში მონაწილეობის მიღებისათვის. მინდა კიდევ ერთხელ გავუსვა ხაზი, რომ თბილისის განვითარებისთვის უმნიშვნელოვანესი დოკუმენტის მიღების პროცესი უნდა იყოს ღია და გამჭვირვალე“,– განაცხადა კახა კალაძემ.
მერის თქმით, თბილისის განვითარებისთვის უმნიშვნელოვანესი დოკუმენტის მიღების პროცესი უნდა იყოს ღია და გამჭვირვალე.