გენერალური პროკურორის ყოფილი მოადგილის ლაშა ნაცვლიშვილის თქმით, „ქართული ოცნება“ მიხეილ სააკაშვილის რეჟიმს იმისთვისაც ებრძოდა, რომ ქათმის ქურდისთვის 20 წლის მისჯის პარალელურად, მკვლელებს უშვებდნენ გარეთ.
„ახლა რა ვითარებაა? ოცნებამ ქათმის ქურდების 20-წლიანი პატიმრობით დასჯის პრაქტიკა მოსპო და 30.000 პატიმარი 9300-ზე დაიყვანა, თუმცა სანაცვლოდ მკვლელები, ყაჩაღები და ნარკორეალიზატორები დაიჭირა. სამაგიეროდ, რა ქნა მიშასნაცვალმა? სწორედ გირგვლიანის მკვლელთა შემწყალებელი მიშას გზა განაგრძო და ყაჩაღების, მკვლელების და ნარკორეალიზატორების მასიურ შეწყალებას მიჰყო ხელი. მაშ ვინ არის ღირებულებების და დაპირებების ერთგული, ოცნება თუ მარგველაშვილი? ალბათ ორივე – ოცნებამ ხალხისთვის მიცემულ პირობას უერთგულა, მარგველაშვილმა კი, როგორც ჩანს, მიშასთვის მიცემულს. მარგველაშვილი ზუსტად ისეთივე უდარდელობით უშვებს ციხიდან განსაკუთრებით მძიმე დანაშაულის ჩადენაში მსჯავრდებულებს, როგორც, თავის დროზე მიშა უშვებდა გირგვლიანის მკვლელებს, რადგან ისინი ერთი და იმავე ღირებულებების მატარებელი, მონათესავე სულებია“,- აცხადებს ნაცვლიშვილი.
იგი განმარტავს, რომ შეწყალების კონსტიტუციური უფლება სამართლებრივ რევიზიას მართლაც არ ექვემდებარება იმ მომენტამდე, ვიდრე ეს უფლება არ არის გამოყენებული როგორც ინსტრუმენტი სხვა დანაშაულის ჩასადენად. ანგარების მოტივით – ქრთამის ასაღებად, ან თუნდაც მართლმსაჯულების აღსრულებისთვის ხელის შეშლის მიზნით – ვინმეს პასუხისმგებლობისგან გასათავისუფლებლად.
„ სწორედ ვინმეს პასუხისმგებლობიდან დაძვრენას საჯარო ინტერესის წინააღმდეგ ჰქვია კანონის ენაზე უფლებამოსილების ბოროტად გამოყენება და არა სხვა რამეს. ყოფით დონეზე რომ ჩამოვწიოთ ეს დისკუსია, ხისგან კომბლის გამოთლაც ნებადართულია, ვიდრე ამ კომბალს თავში ჩამარტყამ და სულს გამაფრთხობინებ“,- აღნიშნავს გენერალური პროკურორის ყოფილი მოადგილე.
წყარო:პრაიმტაიმი