პარლამენტის ადამიანის უფლებათა დაცვის კომიტეტის თავმჯდომარე სოფო კილაძე არ გამორიცხავს, რომ საქართველოს ყოფილი პრეზიდენტის მიხეილ სააკაშვილის საქართველოში ექსტრადირებასთან დაკავშირებით ქართულმა მხარემ პოლონეთს მიმართოს.
“იქნება ეს ექსტრადიცია თუ სხვა კონკრეტული ღონისძიებები, ეს კონკრეტული უწყებების შესაფასებელია. მაგრამ ის ფაქტია, რომ ადამიანი ქვეყნიდან ქვეყანაში მოგზაურობს და გარკვეულ პოლიტიკურ საქმიანობას ეწევა, ეს მისი გადასაწყვეტია და შესაბამისად, იმ ქვეყნების გადასაწყვეტია, რომლებიც კონკრეტულ გადაწყვეტილებას მიიღებენ ბატონი სააკაშვილის მიმართ. ჩვენ აქ არავითარი ბერკეტები და შესაძლებლობა არ გვაქვს, რომ ჩავერიოთ ან პოზიტიურად ან ნეგატიურად“, – განაცხადა კილაძემ.
დეპუტატი სააკაშვილის იმ განცხადებასაც ეხმაურება, სადაც ყოფილი პრეზიდენტი საქართველო-უკრაინის ხელისუფლებებს შორის შესაძლო პოლიტიკურ გარიგებებზე საუბრობს.
„საუბარი იმაზე, რომ გარიგებებს ჰქონდა ადგილი, სასაცილოა. გარიგება რომ ყოფილიყო, საქმე სხვანაირად წავიდოდა. შესაფასებელი ბევრი არაფერია, რადგან ეს შესაბამისი ქვეყნების გადაწყვეტილებაა. თუ სააკაშვილი ფიქრობს, რომ ეს გადაწყვეტილებები სწორი არ არის და სამართლებრივად გამყარებული არაა, მაშინ შესაბამისი ქვეყნის სასამართლოებს უნდა მიმართოს. ჩვენ იმ ქმედებებში ვერ ჩავერევით, რასაც ისინი ახორციელებენ.
გვესმის, რომ სააკაშვილი საქართველოში ხელისუფლების დაკარგვას ვერ ეგუება. ასევე, ვერ ეგუება იმასაც, რომ მის მიმართ სამართლებრივი ნაბიჯებია გადადგმული. ეს მისი მხრიდან ბუნებრივია რეაქციაა, მაგრამ ბრალდებები, რომელიც ჩვენი ხელისუფლებისა და ბიძინა ივანიშვილის მიმართ გაისმის, აბსურდია. ჩვენმა ხალხმა სააკაშვილს უარი მშვიდობიანად არჩევნების გზით უთხრა“, – დასძენს სოფო კილაძე.