პარლამენტის წევრი გუგული მაღრაძე მიიჩნევს, რომ გამართული მეტყველების ჟურნალისტებმა და პედაგოგებმა სპეციალური სავალდებულო ტრენინგი უნდა გაიარონ. ამის შესახებ მან პარლამენტში, განათლებისა და მეცნიერების კომიტეტის სხდომაზე განაცხადა, სადაც ენის სახელმწიფო დეპარტამენტის ხელმძღვანელ გიორგი ალიბეგაშვილს უსმენენ. ინფორმაციას 1tv ავრცელებს.
მისი თქმით, გამართული მეტყველების კუთხით დეპუტატებსაც აქვთ პრობლემები და მსგავსი სახის ტრენინგი მათაც ესაჭიროებათ.
„კარგი იქნება, თუ გამართული მეტყველებისთვის ჟურნალისტები და მასწავლებლები წელიწადში ერთხელ მაინც სპეციალურ სავალდებულო ტრენინგს გაივლიან. ამ ადამიანებს ყველაზე მეტი ზეგავლენა აქვს საზოგადოებაზე, ამიტომ პირველ რიგში, ისინი თუ გაივლიან მსგავს ტრენინგს და აიღებენ სერტიფიკატს ძალიან კარგი იქნება. მეტყველების დროს შეცდომები ჩვენც გვიჭირს პარლამენტარებს, ამიტომ დეპუტატებიც, ვინც ხშირად ვჩანვართ მედიაში და მივმართავთ მოქალაქეებს, კარგი იქნება თუ მსგავს ტრენინგს გავივლით, რადგან ეს გვჭირდება“, – განაცხადა მაღრაძემ.
აღნიშნული შეთავაზებით უმრავლესობის დეპუტატმა გუგული მაღრაძემ გიორგი ალიბეგაშვილს მიმართა. ალიბეგაშვილის განცხადებით, დეპარტამენტი ამ მიმართულებით რესურსების მოძიებაზე მართლაც ფიქრობს.