მოლდოვის ყოფილ პრემიერ-მინისტრს ვლად ფილატს ცხრა წლით თავისუფლების აღკვეთა მიუსაჯეს. ყოფილი პრემიერი კორუფციაში ცნეს დამნაშავედ. სასამართლომ ფილატს ასევე 3700 დოლარის ოდენობის ჯარიმა და ქონების კონფისკაცია დააკისრა.
მოლდოვის პროკურატურა ყოფილი პრემიერ-მინისტრისთვის, ვლად ფილატისთვის 19 წლით თავისუფლების აღკვეთასა და მის მიერ უკანონოდ მოპოვებული ქონების ჩამორთმევას ითხოვს.
მოლდოვის ყოფილი პრემიერი, ლიბერალ-დემოკრატიული პარტიის ლიდერი, ვლად ფილატი კორუფციის ბრალდებით 2015 წლის ოქტომბერში დააკავეს. მას საბანკო სისტემიდან გამქრალ 1 მილიარდ დოლართან კავშირი ედება ბრალად. სამართალდამცველებმა ფილატი ანტიკორუფციულ ბიუროში პარლამენტიდან წაიყვანეს.
ლიბერალ-დემოკრატიული პარტია, რომლის თავმჯდომარეც ვლად ფილატი იყო, ყოფილი პრემიერის წინააღმდეგ სასამართლო საქმეს პოლიტიკურად მოტივირებულად მიიჩნევს.