ეს ადამიანები იყვნენ რუსი გენერლების მძღოლები და მწვადს რომ წვავდნენ, მწვადზე ხახვის და მარილის მოყრით იყვნენ დაკავებულები, – ამის შესახებ საპარლამენტო უმრავლესობის წევრმა ზაზა პაპუაშვილმა პარლამენტის რეზოლუციის პროექტის განხილვისას განაცხადა.
როგორც მან არჩილ ტატუნაშვილის საქმეზე საუბრისას განაცხადა, დარბაზში სხედან ადამიანები, რომლებიც რუსეთთან ერთად არიან ქვეყნის ტერიტორიების დაკარგვის თანაავტორები, ომის და უბედურების თანაავტორები.
მან ხელისუფლებას კითხვით მიმართა, თუ რატომ ითვლება დემოკრატიულ საფრანგეთში, ყოფილი მაღალჩინოსნის პასუხისგებაში მიცემა სამართლიანად და პროგრესულად და რატომ ითვლება ჩვენთან მათი პასუხისგებაში მიცემა სირცხვილად და თავის მოჭრად?
”აქ სხედან ადამიანები, რომლებიც რუსეთთან ერთად არიან ამ უბედურების ავტორები, ქვეყნის ტერიტორიების დაკარგვის თანაავტორები, ომის და უბედურების თანაავტორები. მათი ლიდერი მოსახლეობას პამპერსიანი ელაპარაკებოდა, როგორ დაიცვას თავი დანებით, ჩანგლებით, ცოცხებით და აქანდაზებით. ერთ-ერთ მათგანს მაინც შეეწირა თავი ან რაიმე გაეკეთებინა. ეს ადამიანები იყვნენ რუსი გენერლების მძღოლები და მწვადს რომ წვავდნენ, მწვადზე ხახვის და მარილის მოყრით იყვნენ დაკავებულები და რესტორნებში ქეიფით.
შემდეგ იყო კეფაში ქუსლების რტყმა და რიგი წითელ ხიდთან… ქვეყანა მიატოვეს. მათ მართლა არ ესმით რა უბედურება გაუკეთეს ამ ქვეყანას. ჩვენ ვეუბნეოდით, ნუ აკეთებთ ამას, ნუ წირავთ ქვეყანას, ნუ დახოცავთ ხალხს, ნუ ართმევთ, ნუ იპარავთ ხმებს…”, – აღნიშნა ზაზა პაპუაშვილმა.