დღეს, ზუგდიდის რაიონულ სასამართლოში ცოლის დაჭრაში ბრალდებულ მურმან ყოლბაიას წინასასამართლო სხდომა გაიმართა. ბრალდებულის ადვოკატმა წინასწარი პატიმრობის გირაოთი შეცვლა მოითხოვა. თუმცა მოსამართლე შოთა ბიჭიამ პატიმრობა უცვლელად დატოვა. მისი თქმით, სხვა საფრთხეებთან ერთად, ოჯახში ახალი ძალადობის ჩადენის საშიშროება არსებობს. ინფორმაციას “ლაივპრესი” ავრცელებს.
სასამართლო სხდომას ესწრებოდა ბრალდებულის დაშავებული მეუღლეც, რომელიც ამბობს, რომ მომხდარი “თავისი ბრალია” და ბრალდებული ყურადღებიანი და მზრუნველი მამაა.
“დაქორწინებამდე ძალიან გვიყვარდა ერთმანეთი. ახლა ოთხი შვილი გვყავს. ყველაფერი იმის ბრალია, რომ მან სამსახური ვერ იშოვა და სმა დაიწყო. მე კი სულ ვეჩხუბებოდი, ვაღიზიანებდი. ის არ არის მოძალადე ქმარი. ყურადღებიანი და მზრუნველი მამაა. იმ დღესაც სამსახურიდან დაღლილი მოვედი, ეს კი მთვრალი რომ დამხვდა, გავღიზიანდი და ვეჩხუბე. ჩემი ბრალია. მეგონა სმას მიატოვებდა და იმიტომაც განვაცხადე პოლიციაში, მაგრამ რაც მარტო დავრჩი, დავფიქრდი და მივხვდი, რომ მის გარეშე ცხოვრება ძალიან გაგვიჭირდება მეც და შვილებსაც. მე ის ახლაც ძალიან მიყვარს“, – თქვა დაზარალებულმა ქალმა.
შეგახსენებთ, რომ 9 თებერვალს, ზუგდიდის სასამართლომ ცოლის დაჭრაში ბრალდებულ მურმან ყოლბაიას ორთვიანი წინასწარი პატიმრობა შეუფარდა.