მოვუწოდებ ყველას, არ გამოიყენოს ნარკოტიკული საშუალებები, – აღნიშნული განცხადება პარლამენტის ბიუროს სხდომაზე ჯანდაცვის კომიტეტის თავმჯდომარემ აკაკი ზოიძემ გააკეთა.
„ნარკოტიკები, რომელიც ე.წ. კლუბური თუ მსუბუქი ნარკოტიკების საფარქვეშ ვრცელდება, რეალურად არის სასიკვდილო შხამი და საათების განმავლობაში კლავს, ჩვენი ინფორმაციით, ეს პრეპარატები ვრცელდება სხვადასხვა დასახელების, კლუბური თუ არაკლუბური მსუბუქი ნარკოტიკების საფარქვეშ და ამის შედეგად ბევრი ადამიანი, ვინც ინფორმაციას არ ფლობს, იღუპება და მომავალში კიდევ შეიძლება დაიღუპოს, ამიტომ მოვუწოდებ ყველას, არ გამოიყენოს ნარკოტიკული საშუალებები“, – განაცხადა ზოიძემ.
რაც შეეხება ნარკოპოლიტიკასთან დაკავშირებულ კანონპროექტს, ზოიძის თქმით, დისკუსიები ჯერ კიდევ მიმდინარეობს და მუშაობა შემდეგი რამდენიმე კვირის განმავლობაში დასრულდება.
„ძალიან მნიშვნელოვანია, ნარკოპოლიტიკის ის რეფორმა, რომელზეც ახლა ვმუშაობთ. ძალიან მწვავე დისკუსიები მიდის ამასთან დაკავშირებით, გაყოფილია აზრი. როდესაც ადამიანები იღუპებიან ნარკოტიკული საშუალებებისგან, ეს იწვევს ასევე გააქტიურებას საზოგადოების იმ ნაწილის, რომელიც მოითხოვს, რომ კიდევ უფრო გამკაცრდეს, მათ შორის მომხმარებელთა მიმართ დამოკიდებულება. ამ ვითარებაში აუცილებელია, რომ ჩვენ საბოლოოდ ჩამოვყალიბდეთ. მაქსიმუმ რამდენიმე კვირის განმავლობაში შევძლებთ და დავასრულებთ მუშაობას იმ რეფორმაზე, რომელიც ამ ეტაპზე კონსენსუსის საშუალებით შეიძლება დაინერგოს. უნდა შემცირდეს ნარკოტიკების მომხმარებელთა რაოდენობა და ეს მხოლოდ შესაძლებელია პრევენციაში შესაბამისი თანხების ჩადებით“, – განაცხადა ზოიძემ.