საოკუპაციო ხაზთან მოკლული გიგა ოთხოზორიას ოჯახის წევრები და ახლობლები დღეს მის საფლავზე შეიკრიბნენ. ოთხოზორიას მკვლელობიდან ორი წელი გავიდა.
გარდაცვლილის ოჯახის წევრების მოთხოვნა სამართალის აღსრულება და დამნაშავის დასჯაა. ჯულიეტა ჭანტურიას თქმით, უშუალო მკვლელზე არანაკლებ დამნაშავეა სამი პირი, ვინც კანჯი ოღლის თან ახლდა.
„ველოდებოდი, რომ ყველაფერი გაკეთდებოდა, რათა დამნაშავისა და მისი დამქაშებისთვის ეჩვენებინათ, რომ უდანაშაულო ადამიანის მკვლელობა არავის შერჩებოდა. უმადურობა იქნება, რომ ვთქვა, სახელმწიფომ არაფერი გააკეთა, თუმცა არანაირი შედეგი არ დამდგარა“, – აღნიშნა ჯულიეტა ჭანტურიამ.
გიგა ოთხოზორია 2016 წლის 19 მაისს ხურჩაში, საოკუპაციო ხაზთან მოკლეს. ქუთაისის სასამართლოს გადაწყვეტილებით, დაუსწრებლად რაშიდ კანჯი-ოღლი დამნაშავედ იქნა ცნობილი და მას სასჯელის სახით 14 წლით თავისუფლების აღკვეთა მიესაჯა. კანჯი-ოღლი ინტერპოლის წითელი ცირკულარით იძებნება.