საქართველოს საგარეო საქმეთა მინისტრის პირველი მოადგილის, დავით ზალკალიანის თქმით, საქართველო-აშშ-ის სტრატეგიული პარტნიორობის ქარტიის კომისიის დემოკრატიის სამუშაო ჯგუფის შეხვედრაზე, ბოლო პერიოდში თბილისში განვითარებული მოვლენები პოზიტიურად შეფასდა. მისივე განცხადებით, შეხვედრაზე პოლიტიკურ პლურალიზმზე, მედიის თავისუფლებასა და გამოხატვის თავისუფლებაზეაც ისაუბრეს.
„უაღრესად პოზიტიურად შეფასდა ბოლო პერიოდში თბილისში განვითარებული მოვლენები, კერძოდ ის, თუ როგორი რეაგირება მოახდინა ხელისუფლებამ, კერძოდ, შსს-მ, იმისთვის, რომ შეკრებილებს მისცემოდათ შესაძლებლობა, თავისუფლად გამოეხატათ პოზიცია. პოზიტიურად იყო შეფასებული ყველა ჩატარებული არჩევნები. ასევე, ვისაუბრეთ მოლოდინებზე, რომელიც ჩვენს პარტნიორს აქვს მომავალ საპრეზიდენტო არჩევნებთან დაკავშირებით. ამ მიმართულებით, ხელისუფლება იქნება აქტიური. უზრუნველვყოფთ, რომ საარჩევნო გარემო იყოს თავისუფალი, დემოკრატიული“,- განაცხადა ზალკალიანმა.