ტელეკომპანია იმედში შეჭრისა და 7 ნოემბრის აქციის დარბევის საქმეზე თბილისის საქალაქო სასამართლოში დევნილთა მინისტრი და მაშინდელი ომბუდსმენი სოზარ სუბარი დაიკითხა.
სოზარ სუბარმა სასამართლოში დეტალურად გაიხსენა 2007 წლის ნოემბრის მოვლენები. მისი განცხადებით, 2007 წლის 4 ნოემბერს მაშინდელი შს მინისტრის ვანო მერაბიშვილის სამუშაო ოთახში შეხვედრა შედგა, რომელსაც მაშინდელი მაღალჩინოსნები ესწრებოდნენ, მათ შორის გუბერნატორები, დათა ახალაია, დავით კეზერაშვილი, გიგი უგულავა და სხვები. სუბარის თქმით, სწორედ ამ შეხვედრაზე ვანო მერაბიშვილმა მომიტინგეების დარბევის ბრძანება გასცა. სუბარის თქმით, ამ შეხვედრის მთავარი აქცენტები რეგიონებიდან ჩამოსული აქტივისტების ცემა იყო.
“შეხვედრაზე ითქვა, რომ ყველა აქტიური ადამიანი სასტიკად უნდა სცემონ, ისე რომ რამდენიმე თვე ფეხზე ვერ ადგნენ და ითქვა, რომ თუ ვინმემ არ იცით ეს როგორ ხდება დათა ახალაიასგან შეგიძლიათ ისწავლოთო” – იხსენებს სუბარი. მისი თქმით შეხვედრაზე ასევე ითქვა, რომ რეგიონებში არცერთი ადამიანი არ უნდა დაბრუნდეს ისე, რომ ნაცემი არ იყოს, რადგან “ნაცემი ადამიანი საქართველოში არის ჩმორი”.
სოზარ სუბარმა, ასევე დეტალურად გაიხსენა ტელეიმედში შეჭრის საქმეც.
“სააკაშვილმა პირადად თქვა ჩემთან შეხვედრაზე, რომ ბევრი შეცდომა იყო დაშვებული და ის აპირებს, რომ აბსოლუტურად შეცვალოს მმართველობის სტილი, სამწუხაროდ, დღევანდელი გადასახედიდან შემიძლია ვთქვა, რომ ეს ასე არ მოხდა”, – განაცხადა სუბარმა.
დაცვის მხარე ფიქრობს, რომ დღევანდელი დაკითხული მოწმეების ჩვენებები არასანდოა, ვინაიდან მათ კონკრეტული ინტერესები აქვთ ყოფილი მაღალჩინოსნების მიმართ.
რაც შეეხება სახელმწიფო ბრალმდებელს, ჯარჯი წიკლაურის თქმით, დღევანდელი მოწმეების ჩვენებების შემდეგ კიდევ ერთხელ დადასტურდა ყოფილი მაღალჩინოსნების ბრალეულობა. პროკურორი დარწმუნებულია, რომ სასამართლო გამამტყუნებელ განაჩენს გამოიტანს.